Astana Motors rahbari Nurlan Smagulov O‘zbekiston avtomobil bozorini baholadi. Bu haqda Forbes Kazakstan’da e’lon qilingan maqolaga tayanib, Spot xabar berdi.
“Bu juda qiziq bozor, biz u yerda o‘zimizni qulay his qilamiz. U yerning o‘z qonunlari va o‘z ishlab chiqaruvchilarining himoyasi bor. Mahalliy ishlab chiqaruvchilar bilan integratsiya masalalarini muhokama qilyapmiz”, — deydi Smagulov.
Hozirda Astana Motors’ning mamlakatda to‘qqizta dileri bor — to‘rttasi xususiy va beshtasi mustaqil. Kompaniya Toshkent, Buxoro, Samarqand, Namangan va Farg‘onada ish olib bormoqda.
2021-yilda yana to‘rtta diler qo‘shiladi — bitta xususiy va uchta mustaqil. Astana Motors’ning xususiy avtomarkazlari Toshkentda joylashgan, qolgan shaharlardagilari mustaqil: bu — kompaniyaning mahalliy tadbirkorlarning salohiyatiga sarmoya kiritmoqchi bo‘lgan tashkilotning maxsus siyosati hisoblanadi.
Shuningdek, Astana Motors’ning ma’lum qilishicha, kompaniya mahalliy ishlab chiqaruvchilar bilan hamkorlik qilish imkoniyatini ko‘rib chiqmoqda. 2020-yilda Qozog‘iston kompaniyasi O‘zbekistonga 3,5 mingta avtomobil eksport qilgan. 2021-yildagi reja — 20 ming avtomobilni Qozog‘iston bozoriga yetkazish va 10 mingtasini eksport qilish, jumladan, O‘zbekistonga ham.
Eslatib o‘tamiz, Hyundai Auto Asia’ning birinchi dilerlik avtomarkazi Toshkentda 2019-yilning yanvarida ochilgan edi. O‘sha yilning o‘zida kompaniya mamlakat bo‘ylab 244 ta Hyundai avtomobillarini sotgan.
Izoh (0)