Toshkent shahar IIBB tadbirkorlik bilan shug‘ullanuvchi onasi IIB xodimlari tomonidan noqonuniy tarzda qo‘lga olinganini aytgan o‘g‘ilning videomurojaatiga izoh berdi.
Ijtimoiy tarmoqlarda videomurojaat bilan chiqqan yigit tadbirkorlik bilan shug‘ullanuvchi onasi noqonuniy tarzda Chilonzor tumani IIO FMB xodimlari tomonidan qo‘lga olingani va unga xodimlar tomonidan shikast yetkazilgani ta’kidlangan.
Poytaxt IIBBning ma’lum qilishicha, mazkur xabar haqiqatdan yiroq. Video muallifining onasi — 49 yoshli Ozoda Sh. hamda 26 yoshli Dilshodbek B. ayblanuvchi tariqasida jinoiy ishga jalb qilingan. Chilonzor tumani jinoiy ishlar bo‘yicha sudi ularga nisbatan qamoqqa olish ehtiyot chorasini qo‘llagan.
Mazkur jinoiy ish Jinoyat kodeksining 169-moddasi 4-qismi “a” bandi bo‘yicha mas’uliyati cheklangan jamiyat rahbari Sanjar B.ning arizasiga asosan qo‘zg‘atilgan. Arizachining ma’lum qilishicha, 2020-yilning dekabr oyidan 2021-yilning fevral oyiga qadar uning omborxonasidan matolar yo‘qolgan. Zararning umumiy miqdori 129 ming AQSh dollarini tashkil etgan.
“2021-yilning 24-fevral kuni Sanjar B. ishchisi Dilshodbek B.ni omborxonadan o‘g‘rilik qilayotganida ushlab olgan. Sanjar B.ning savollariga Dilshodbek o‘g‘irlangan matolarni Ozodaning tikuv sexiga olib borib sotishini aytgan. Matolarning doimiy xaridori bo‘lgan Ozodani mollarning narxi qoniqtirmaganligi bois u Dilshodbek B. bilan til biriktirib, unga omborxonadan mato o‘g‘irlab olib kelishini taklif qilgan”, — deyiladi xabarda.
Hozirda tergov ishlari davom etmoqda.
Avvalroq Chilonzorda omborxonaga ikki marta kirib, jami 45 million so‘mlik ayollar oyoq kiyimini o‘g‘irlagan shaxs ushlangani to‘g‘risida xabar berilgandi.
Izoh (0)