AQSh Davlat departamentining rasmiy vakili Ned Prays Rossiyaning to‘rtta onlayn platformasi AQSh tomonidan tasdiqlangan vaksinalar haqida noto‘g‘ri ma’lumot tarqatganini ma’lum qildi. Uning so‘zlariga ko‘ra, ular buni Rossiya razvedka xizmati boshchiligida amalga oshirgan. Bu haqda “Kommersant” xabar berdi.
“Maxfiy xizmatlar nazorati ostida ishlaydigan va vaksinalar haqida noto‘g‘ri ma’lumot tarqatgan Rossiyaning to‘rtta onlayn platformasi aniqlandi... Shubhasiz, Rossiya o‘zining eski hiyla-nayranglarini qilib, hayotni saqlab qolish vositasi bo‘lgan vaksinalar haqida noto‘g‘ri ma’lumot tarqatishi odamlarni xavf ostiga qo‘yishi mumkin”, — dedi Prays.
Avvalroq Oq uy Rossiya tomonining vaksinalar to‘g‘risida noto‘g‘ri ma’lumot tarqatish bo‘yicha taktikasi haqida bilishini aytgan edi. Uning so‘zlariga ko‘ra, Vashington dezinformatsiyaga qarshi turadi. Shuningdek, Yevropa diplomatiyasi rahbari Jozep Borrel kremlparast ommaviy axborot vositalari koronavirus bilan bog‘liq yolg‘on ma’lumotlar tarqatayotganini aytdi.
Rossiya prezidentining matbuot kotibi Dmitriy Peskov “vaksinalar masalasida qanday tanqid bo‘lmasin”, unda Rossiya maxsus xizmatlari ishtirok etmaganini aytdi.
Avvalroq The New York Times AQSh Rossiyaga qarshi bir qator kiberhujumlar tayyorlayotgani haqida xabar bergandi.
Izoh (0)