Armaniston hukumati mamlakatda Birlashgan Millatlar Tashkilotining Bolalar jamg‘armasi (YuNISEF) vakili Marin Klark-Xattingning faoliyatini muammoli deb topib, uni vakolatlaridan mahrum qildi. Bu haqda Armaniston Tashqi ishlar vazirligi matbuot kotibi Anna Nagdalyan ma’lum qildi, deb yozadi “RBK”. Shu bilan birga, OAV Marine Klark-Xatting josuslikda ayblanib, persona non grata deb e’lon qilingani haqida xabar qilgan.
“Armanistonda rasmiylar Birlashgan Millatlar Tashkilotining Bolalar jamg‘armasi (YuNISEF) vakili Marin Klark-Xattingning faoliyatini mamlakat uchun muammoli deb hisoblab, uning vakolatlarini to‘xtatdi. YuNISEFning Armanistondagi vakili Marin Klark-Xattingning ish uslubiyatidagi hamkorlik o‘rnatishga hech qanday hissa qo‘shmaydigan umumiy kamchiliklar Armaniston uchun o‘ta muammoli edi, shuning uchun Armaniston hukumati Klark-Xattingning faoliyatini to‘xtatishga qaror qildi”, — dedi Nagdalyan.
Matbuot kotibining ta’kidlashicha, Armaniston mazkur qaror to‘g‘risida BMTning doimiy koordinatori va YuNISEF vakillarini xabardor qilgan.
“Sputnik Armaniya” xabariga ko'ra, ayni paytda Klark-Xatting mamlakatni tark etgan.
Shuningdek, Mediaport Telegram-kanali YuNISEF vakilining Armanistonda Ozarbayjon va Buyuk Britaniya foydasiga josuslik qilgani uchun persona non grata deb e’lon qilingani haqida xabar bergan. Xabarga ko‘ra, go‘yoki rasmiylar ushbu faktni jamoatchilikdan yashirishni istagan
Klark-Xatting 2020-yil iyulida Armanistondagi YuNISEF vakili etib tayinlangan edi. U Armanistonda sakkiz oy faoliyat yuritdi. Bungacha u YuNISEFning Malayziyadagi vakili bo‘lib ishlagan.
Ma’lumot uchun YuNISEF — BMT homiyligida bolalar va onalik masalalariga bag‘ishlangan xalqaro tashkilot. Tashkilotning asosiy maqsadlari bolalar orasida o‘limni kamaytirish va ta’lim darajasini oshirishdir.
Avvalroq Armanistonda bosh vazir Nikol Pashinyanga qarshi namoyishlardan keyin politsiya prezident qarorgohini qat’iy qo‘riqlov ostiga olgani haqida xabar berilgandi. 6-mart, shanba kuni Armaniston bosh vaziri Nikol Pashinyanga qarshi bo‘lganlar yana norozilik aksiyasini uyushtirgan: ular Yerevan markaziga chiqib, bosh vazirning iste’fosini talab qilgan.
Mavzuga doir: Armanistonda bosh vazirga qarshi namoyishchilar hukumat binosiga bostirib kirdi (video)
Bu voqeadan keyin Armaniston Qurolli Kuchlari bosh shtabi mamlakat bosh vaziri Nikol Pashinyan va hukumatning zudlik bilan iste’foga chiqishini talab qildi. Bayonotga imzo chekkan 40 nafar yuqori martabali harbiy xizmatchining fikricha, Xachatryan “yuzaki o‘ylangan va asossiz sabablarga ko‘ra” ishdan bo‘shatilgan.
Izoh (0)