Armanistonda mamlakat bosh vaziri Nikol Pashinyanning raqiblari Yerevandagi parlament binosiga kirish yo‘lini yopishga urinishi oqibatida namoyishchilar hamda politsiya o‘rtasida to‘qnashuvlar kuzatildi. Bu haqda “RBK” xabar bergan.
Muxolifatning “Vatanni qutqarish harakati” partiyasining yagona nomzodi Vazgen Manukyan odamlarni parlament binosiga kirish yo‘lini yopishga chorlagan, deb yozmoqda “Armenpress”.
“Bino yoniga chodir tikamiz va hech bir deputatning ichkariga kirishiga yo‘l qo‘ymaymiz. Biz milliy majlislar o‘tkaziladigan hududni o‘rab olamiz, ular xalqni qoniqtiradigan qaror qabul qilinganidan keyingina ishlashi mumkin”, — deya Manukyan so‘zlarini keltirgan agentlik.
“Interfaks”ning xabar qilishicha, yuzlab namoyishchilar Demirchyan va Bagramyan ko‘chalarida parlamentga kirish va chiqish yo‘lini yopishga uringan. Huquq-tartibot idoralarining xodimlari avvaliga norozilik bildirayotganlarga qarshi hech qanday chora ko‘rmagan, biroq muayyan vaqt o‘tgach, politsiya va namoyishchilar o‘rtasida to‘qnashuvlar kuzatilgan.
“Sputnik Armaniston”ning qayd etishicha, politsiya namoyishchilarning bir nechtasini hibsga olgan. Shuningdek, parlament binosiga kirish yo‘llari politsiya tomonidan temir to‘siqlar bilan o‘ralgan.
“Vatanni qutqarish harakati”ning koordinatori Ishxan Sagatelyan muxolifatning parlamentga bostirib kirish niyati yo‘qligini bildirgan va namoyishchilardan provakatsiyalarga aldanmaslikni so‘ragan.
Armaniston muxolifati 8-fevralda bosh vazir Nikol Pashinyandan iste’fo berishni talab qilgan. Muxolifat hukumat rahbarini 2020-yil 10-noyabrda Tog‘li Qorabog‘dagi nizoni hal etishda Ozarbayjon bilan sulh tuzib, xalqqa xiyonat qilganlikda ayblamoqda. Pashinyanning o‘zi tinchlik shartnomasini tuzish va hududni qo‘shni davlatga berishdan boshqa chorasi bo‘lmaganini aytib o‘tgan. Pashinyan iste’foga chiqmagach, muxolifat 20-fevraldan boshlab hukumatga qarshi ommaviy norozilik namoyishlari o‘tkazishni va’da qilgan.
Avval 1-martda Armanistonda bosh vazirga qarshi namoyishchilar hukumat binosiga bostirib kirgani, keyinchalik Yerevanda politsiya Armaniston prezidenti Armen Sarkisyanning qarorgohini qat’iy qo‘riqlov ostiga olgani haqida xabar berilgandi.
Izoh (0)