Qibraydagi ariqdan har kuni qon oqayotgani, u Olmazor tumani markazidagi suzish havzasiga quyilishi haqida xabar berilgandi. Holat bo‘yicha Toshkent viloyati hokimligi rasmiy bayonot berdi.
Ma’lum qilinishicha, holat o‘rganilganda, “Obod Savdo Biznes” MChJga qarashli kushxonadan hosil bo‘lgan oqova suvlar zax ariqqa oqizilganligi aniqlangan.
Ushbu holat yuzasidan 2021-yil 26-fevral kuni Ekologiya va atrof-muhitni muhofaza qilish sohasidagi nazorat bo‘yicha Qibray tumani inspeksiyasi tomonidan 20/21-sonli ogohlantirish xati berilgan. Unda “Tabiatni muhofaza qilish to‘g‘risida”gi qonunning 19-moddasi, “Suv va suvdan foydalanish to‘g‘risida”gi qonunning 18, 19, 99-moddalari talablari buzilishi ro‘y bergan.
Buning oqibatida aybdorlar Ma’muriy javobgarlik to‘g‘risidagi kodeksning 72-moddasi 1-qismi (suv zaxiralarini muhofaza qilish qoidalarini buzish) bilan ma’muriy javobgarlikka tortilishiga sabab bo‘ladi.
Aniqlanishicha, ushbu ixtisoslashgan so‘yish korxonasi binolari 2014-yilda “Nur Farrux” fermer xo‘jaligidan “Obod Savdo Biznes” MChJ tasarrufiga o‘tgan va Qibray tumani hokimining № 2494 sonli qarori 2014-yil 9-dekabrda qabul qilingan. Ushbu ixtisoslashgan so‘yish korxonasi 2018-yil ishga tushirilgan, lekin hujjatlar ko‘zdan kechirilganda, aynan ixtisoslashgan so‘yish korxonasi uchun tegishli tashkilotlarning xulosalari mavjudligi taqdim qilinmadi.
Oqova suvlar va kushxona hududidan chiqayotgan oqovalar uchun qilingan o‘ralar gidroizolyatsiyalangan (betondan yasalgan) bo‘lib, lekin oqovalarni yig‘masdan, aksincha oqovalar dalaga va zax ariqqa tushirilgan.
Qayd etilishicha, “Obod Savdo Biznes” korxonasi tomonidan oqova suvlarni o‘radan tortib olib ketilishi uchun shartnoma hamda maishiy chiqindilarni olib ketish uchun ham “Toza hudud” bilan shartnoma tuzilmagani aniqlangan. Shuningdek, kushxonani yuvish vaqtida chiqqan qon aralash suvlar va so‘yilgan mol oshqozonidan chiqqan yem qoldiqlari binoning orqa dala qismiga chiqarilishi oqibatida tartibsiz holatga kelib qolgan.
Oqibatda “Aholining sanitariya-epidemiologik osoyishtaligi to‘g‘risida”gi qonunning 16-moddasi buzilgan. Davlat veterinariya qo‘mitasining 2018-yil 27-iyuldagi ixtisoslashgan so‘yish korxonalariga nisbatan vaqtinchalik veterinariya-sanitariya qoida va me’yorlarini tasdiqlash haqidagi 25-sonli qarori talablariga rioya etilmagan.
Bundan tashqari, mutaxassislar tomonidan aniqlangan holat va tartibbuzarliklarni zudlik bilan bartaraf qilish choralarini ko‘rish, kushxonadan chiqayotgan oqovalar uchun maxsus gidroizolyatsiyalangan o‘ra qurilishi nazoratga olingan. Ayni paytda kushxonadan chiqadigan oqova suvning zax ariqqa oqizilishi to‘xtatilib, o‘rnatilgan quvurlar kovlab olingan.
Kamchiliklarni bartaraf etish uchun korxona rahbariga 5 kun muddat berilgan. Qibray tuman ekologiya va atrof-muhitni muhofaza qilish inspeksiyasi tomonidan korxonaning atrof-muhitga yetkazgan zarari hisoblanib, tegishli tashkilotlarga taqdim etilishi ma’lum qilingan.
Bundan avval bu holat Veterinariya davlat qo‘mitasi tomonidan o‘rganilgandi.
Izoh (0)