Қибрайдаги ариқдан ҳар куни қон оқаётгани, у Олмазор тумани марказидаги сузиш ҳавзасига қуйилиши ҳақида хабар берилганди. Ҳолат бўйича Тошкент вилояти ҳокимлиги расмий баёнот берди.
Маълум қилинишича, ҳолат ўрганилганда, «Обод Савдо Бизнес» МЧЖга қарашли кушхонадан ҳосил бўлган оқова сувлар зах ариққа оқизилганлиги аниқланган.
Ушбу ҳолат юзасидан 2021 йил 26 февраль куни Экология ва атроф-муҳитни муҳофаза қилиш соҳасидаги назорат бўйича Қибрай тумани инспекцияси томонидан 20/21-сонли огоҳлантириш хати берилган. Унда «Табиатни муҳофаза қилиш тўғрисида»ги қонуннинг 19-моддаси, «Сув ва сувдан фойдаланиш тўғрисида»ги қонуннинг 18, 19, 99-моддалари талаблари бузилиши рўй берган.
Бунинг оқибатида айбдорлар Маъмурий жавобгарлик тўғрисидаги кодекснинг 72-моддаси 1-қисми (сув захираларини муҳофаза қилиш қоидаларини бузиш) билан маъмурий жавобгарликка тортилишига сабаб бўлади.
Аниқланишича, ушбу ихтисослашган сўйиш корхонаси бинолари 2014 йилда «Нур Фаррух» фермер хўжалигидан «Обод Савдо Бизнес» МЧЖ тасарруфига ўтган ва Қибрай тумани ҳокимининг № 2494 сонли қарори 2014 йил 9 декабрда қабул қилинган. Ушбу ихтисослашган сўйиш корхонаси 2018 йил ишга туширилган, лекин ҳужжатлар кўздан кечирилганда, айнан ихтисослашган сўйиш корхонаси учун тегишли ташкилотларнинг хулосалари мавжудлиги тақдим қилинмади.
Оқова сувлар ва кушхона ҳудудидан чиқаётган оқовалар учун қилинган ўралар гидроизоляцияланган (бетондан ясалган) бўлиб, лекин оқоваларни йиғмасдан, аксинча оқовалар далага ва зах ариққа туширилган.
Қайд этилишича, «Обод Савдо Бизнес» корхонаси томонидан оқова сувларни ўрадан тортиб олиб кетилиши учун шартнома ҳамда маиший чиқиндиларни олиб кетиш учун ҳам «Тоза ҳудуд» билан шартнома тузилмагани аниқланган. Шунингдек, кушхонани ювиш вақтида чиққан қон аралаш сувлар ва сўйилган мол ошқозонидан чиққан ем қолдиқлари бинонинг орқа дала қисмига чиқарилиши оқибатида тартибсиз ҳолатга келиб қолган.
Оқибатда «Аҳолининг санитария-эпидемиологик осойишталиги тўғрисида»ги қонуннинг 16-моддаси бузилган. Давлат ветеринария қўмитасининг 2018 йил 27 июлдаги ихтисослашган сўйиш корхоналарига нисбатан вақтинчалик ветеринария-санитария қоида ва меъёрларини тасдиқлаш ҳақидаги 25-сонли қарори талабларига риоя этилмаган.
Бундан ташқари, мутахассислар томонидан аниқланган ҳолат ва тартиббузарликларни зудлик билан бартараф қилиш чораларини кўриш, кушхонадан чиқаётган оқовалар учун махсус гидроизоляцияланган ўра қурилиши назоратга олинган. Айни пайтда кушхонадан чиқадиган оқова сувнинг зах ариққа оқизилиши тўхтатилиб, ўрнатилган қувурлар ковлаб олинган.
Камчиликларни бартараф этиш учун корхона раҳбарига 5 кун муддат берилган. Қибрай туман экология ва атроф-муҳитни муҳофаза қилиш инспекцияси томонидан корхонанинг атроф-муҳитга етказган зарари ҳисобланиб, тегишли ташкилотларга тақдим этилиши маълум қилинган.
Бундан аввал бу ҳолат Ветеринария давлат қўмитаси томонидан ўрганилганди.
Изоҳ (0)