“Yuksalish” umummilliy harakati Oliy Majlis Senati bilan hamkorlikda “Yoshlarni qo‘llab-quvvatlash va aholi salomatligini mustahkamlash yili” Davlat dasturi ijrosi bo‘yicha onlayn monitoring olib borish maqsadida maxsus platforma (jamoatchilik.uz)ni ishga tushirgan edi. Ushbu umummilliy harakat matbuot xizmati Davlat dasturi ijrosi haqida ma’lumot berdi.
Qayd etilishicha, Davlat dasturi doirasida 2021-yilning fevral oyida 7 ta band bo‘yicha vazifalar ijrosi ko‘zda tutilgan. Monitoring davomida dasturning 8 ta bandi ijrosi ta’minlangan, shundan 5 ta bandi muddatidan avval bajarilgan.
Shuningdek, fevral oyida bajarilishi lozim bo‘lgan ayrim bandlar bo‘yicha ijro muddatlariga amal qilinmagan.
Jumladan, 73-band yuzasidan Vodorod energetikasi texnologiyalari ilmiy-amaliy innovatsion markazini tashkil etish bo‘yicha Prezident qarori loyihasi o‘z vaqtida qabul qilish uchun kiritilmagan.
151-band bo‘yicha Prezidentning “Yoshlarning tadbirkorlik tashabbuslari, startap va g‘oyalarini yanada qo‘llab-quvvatlash chora-tadbirlari to‘g‘risida”gi qarori loyihasi ishlab chiqilgan bo‘lib, loyiha o‘z vaqtida qabul qilish uchun kiritilmagan.
184-bandda ko‘zda tutilgan aholiga davlat tomonidan bepul tibbiy xizmatlar va dori vositalari bilan kafolatlangan paket doirasida tibbiy xizmat ko‘rsatish tizimini bosqichma-bosqich amaliyotga joriy etish chora-tadbirlari bajarilmadi. Bunda kafolatlangan paketga kiritiladigan tibbiy xizmatlar va dori vositalari ro‘yxatini ishlab chiqish va tasdiqlash, Sirdaryo viloyatida tajriba-sinov tariqasida aholiga kafolatlangan paket doirasida tibbiy xizmatlar ko‘rsatishni yo‘lga qo‘yish nazarda tutilgan.
218-band bo‘yicha madaniy meros obyektlarining hisobini yuritish, saqlash va himoyasini ta’minlash bo‘yicha dastur qabul qilinmagan.
Bugungi kungacha yuqoridagi to‘rtta band ijrosiga mas’ul vazirlik, idoralar tomonidan ijro muddati kechiktirilgani yoki qo‘shimcha ishlanishi belgilangani haqida jamoatchilikka tushuntirish berilmagani ta’kidlangan.
“Qayd etish kerakki, Davlat dasturlari ijrosini monitoring qilish jarayonida ijro intizomiga oid qator kamchiliklar o‘tgan yillar mobaynida ham kuzatib kelindi. Davlat idoralarida ijro intizomi pastligi tanqid qilindi. Joriy yilning 10-fevral kuni Prezident Shavkat Mirziyoyev raisligida Davlat dasturi ijrosini samarali tashkil etish masalalari yuzasidan o‘tkazilgan videoselektor yig‘ilishida mas’ul ijrochilar — bosh vazir o‘rinbosarlari, vazirlik va tarmoqlar rahbarlari, hokimlar va sektor boshliqlari zimmasiga tegishli har bir ko‘rsatkichga erishish bo‘yicha shaxsiy javobgarlik yuklatilishi ta’kidlandi”, — deyiladi “Yuksalish” umummilliy harakati xabarida.
Eslatib o‘tamiz, 2021-yil 18-yanvar kuni “Yoshlarni qo‘llab-quvvatlash va aholi salomatligini mustahkamlash yili” Davlat dasturi loyihasi jamoatchilik muhokamasi uchun e’lon qilindi. 3-fevral kuni Davlat dasturini tasdiqlash to‘g‘risidagi Prezident farmoni imzolandi.
2021-yilgi Davlat dasturi 273 banddan iborat. Unda belgilangan chora-tadbirlarni bajarish uchun qariyb 30 trillion so‘m, 2 milliard 600 million dollar va 57 million yevrodan ziyod mablag‘ yo‘naltirilishi ko‘zda tutilgan.
Izoh (0)