Turkiya tashqi ishlar vaziri Mevlut Chavusho‘g‘li boshchiligidagi delegatsiya O‘zbekistonga tashrif buyurib, Xiva, Buxoro hamda Samarqand shaharlarida bo‘ldi. Bu haqda Turizmni rivojlantirish davlat qo‘mitasi xabar qildi.
Xiva shahriga 6-mart kuni tashrif buyurgan turkiyalik mehmonlar tantanali ravishda kutib olindi. Turkiya delegatsiyasiga O‘zbekiston bosh vaziri o‘rinbosari – Turizmni rivojlantirish davlat qo‘mitasi raisi Aziz Abduhakimov, tashqi ishlar vaziri Abdulaziz Komilov va Xorazm viloyati hokimi Farhod Ermanov hamrohlik qildi.
Ochiq osmon ostidagi muzey shahar hisoblangan Xivadagi Ichan Qal’a majmuasida ular uchun madaniy tadbirlar tashkil etilib, Xorazm viloyati qo‘g‘irchoq teatri jamoasining 58-xon teatrlashtirilgan tomoshasi namoyish etildi.
Ta’kidlanishicha, Turkiya bilan hamkorlikda ishlangan “Mendirman Jaloliddin” tarixiy seriali namoyishidan so‘ng Xiva xonligi va voha tarixiga katta qiziqish uyg‘ongani mehmonlar tomonidan alohida e’tirof etildi.
Shundan so‘ng Turkiya tashqi ishlar vaziri Mevlut Chavusho‘g‘li boshchiligidagi delegatsiya Buxoroga tashrif buyurdi.
Bu yerda mehmonlar Poyi Kalon majmuasi, Mir Arab madrasasi, Labi Hovuz kompleksi kabi qator diqqatga sazovor maskanlarda bo‘lishdi. Ular mahalliy hunarmandlar bilan uchrashib, ularning milliy mahsulotlari bilan yaqindan tanishdi. Bundan tashqari, Ark qo‘rg‘onida teatrlashtirilgan sahna ko‘rinishlari turkiyalik mehmonlar e’tiboriga havola etildi.
Turkiya delegatsiyasi vakillari 7-mart kuni Samarqandga keldi va bu yerda Turkiyaning Bosh konsulxonasi ochilishida ishtirok etdi. Konsulxonaning ochilish marosimida Turkiya TIV rahbari Mevlut Chavusho‘g‘li, O‘zbekiston bosh vaziri o‘rinbosari Aziz Abduhakimov, O‘zbekiston TIV rahbari Abdulaziz Komilov hamda Samarqand viloyati hokimi Erkinjon Turdimov qatnashdi.
Ta’kidlanishicha, Bosh konsulxona ikki mamlakat o‘rtasida madaniy-gumanitar, turizm sohalarida hamkorlikni kuchaytirish va hududlararo aloqalarning rivojlanishiga ijobiy turtki beradi.
Ma’lum qilinishicha, 2018-yilda tarixda ilk bor Istanbul–Samarqand yo‘nalishidagi aviaparvozlar yo‘lga qo‘yilgan. Pandemiya sababli qo‘yilgan cheklovlar doirasida vaqtincha to‘xtatilgan bu reys yaqin vaqtlarda qayta ochiladi.
Qayd etilishicha, turk xalqida Imom Al-Buxoriy, Imom Al-Moturudiy, Amir Temur, Mirzo Ulug‘bek kabi allomalarga bo‘lgan qiziqish juda katta, bu mamlakatdan tarixiy shaharlarga ziyorat maqsadida kelayotgan sayyohlar soni tobora ortmoqda.
Bundan avval Turkiyaning O‘zbekistondagi yangi elchisi ish boshlagani, Anqarada Muhammad al-Xorazmiy sharafiga yodgorlik o‘rnatilgani hamda Shavkat Mirziyoyev Rajab Toyyib Erdo‘g‘onni tug‘ilgan kuni bilan tabriklagani haqida xabar berilgandi.
Izoh (0)