Netflix platformasi o‘zining mobil dasturida qisqa yumoristik videolar — striming servisdagi shoular, kino va seriallardan parchalar ulashish mumkin bo‘lgan lentani ishga tushirdi, deb xabar beradi Esquire. Foydalanuvchilar formati jihatidan uni TikTok’ga qiyoslamoqda.
Bo‘lim “Darrov kulgi” (Fast Laughs) nomini olgan. TikTok’dan farqli o‘laroq, foydalanuvchilar u yerga o‘zlarining shaxsiy roliklarini yuklay olmaydi — lenta faqat Netflix kontentini ko‘rsatadi. Videoni ijtimoiy tarmoqlar orqali ulashish mumkin, layklar o‘rniga Lol emojisidan foydalanish taklif etiladi.
“‘Darrov kulgi’ funksiyasi seriallar, filmlar va stendap-chiqishlarni ro‘yxatingizga qo‘shish, shuningdek, ularni darhol tomosha qilish imkonini beradi”, — deyiladi kompaniya xabarida.
Hozirda funksiyadan faqat iPhone qurilmalarida foydalanish mumkin, biroq uni Android’lar uchun ham testdan o‘tkazish boshlanadi.
Eslatib o‘tamiz, 2020-yilning aprelida YouTube Xitoyning TikTok servisiga raqobatchi yaratish ustida ish boshlagani to‘g‘risida xabar berilgandi.
Izoh (0)