Facebook kompaniyasiga qarashli Instagram ijtimoiy tarmog‘i dasturining interfeysiga katta o‘zgartirish kiritildi. Undagi asosiy sahifa qayta ko‘rib chiqilgan, deb xabar beradi IXBT.

Foto: IXBT

Ma’lum qilinishicha, ikkita yangi bo‘lim — Shop (do‘kon) va Reels paydo bo‘lgan. Kiritilgan yangilik sabab boshqa interfeys elementlarining ham joylashuvi o‘zgargan.

Reels bo‘limi TikTok uslubidagi qisqa videoroliklarni o‘z ichiga oladi. Avvalroq xalqaro masshtabda taqdim qilingan servis endilikda Instagram’ning asosiy qismlaridan biri bo‘ladi.

Shop bo‘limida esa foydalanuvchilar xaridga oid shaxsiy tavsiyalar hamda maxsus videoroliklarni, shuningdek, yangi kolleksiya va boshqalarni ko‘rishi mumkin bo‘ladi. Bundan tashqari, ushbu bo‘lim brend va ishlab chiqaruvchilar bilan bog‘lanish imkoniyatini yaratadi, deyiladi xabarda.

Ma’lumot uchun, 2019-yilda Instagram TikTok’ga o‘xshash Reels dasturini sinovdan o‘tkazayotgani va Stories’da foydalanish imkoni bo‘lgan yangi funksiya yordamida 15 soniyali roliklar suratga olish, ularga effektlar va musiqa qo‘shish, video tezligini o‘zgartirish mumkinligi haqida xabar berilgandi.