Netflix платформаси ўзининг мобил дастурида қисқа юмористик видеолар — стриминг сервисдаги шоулар, кино ва сериаллардан парчалар улашиш мумкин бўлган лентани ишга туширди, деб хабар беради Esquire. Фойдаланувчилар формати жиҳатидан уни TikTok’га қиёсламоқда.
Бўлим «Дарров кулги» (Fast Laughs) номини олган. TikTok’дан фарқли ўлароқ, фойдаланувчилар у ерга ўзларининг шахсий роликларини юклай олмайди — лента фақат Netflix контентини кўрсатади. Видеони ижтимоий тармоқлар орқали улашиш мумкин, лайклар ўрнига Lol эможисидан фойдаланиш таклиф этилади.
«‘Дарров кулги’ функцияси сериаллар, фильмлар ва стендап-чиқишларни рўйхатингизга қўшиш, шунингдек, уларни дарҳол томоша қилиш имконини беради», — дейилади компания хабарида.
Ҳозирда функциядан фақат iPhone қурилмаларида фойдаланиш мумкин, бироқ уни Android’лар учун ҳам тестдан ўтказиш бошланади.
Эслатиб ўтамиз, 2020 йилнинг апрелида YouTube Хитойнинг TikTok сервисига рақобатчи яратиш устида иш бошлагани тўғрисида хабар берилганди.
Изоҳ (0)