Yangi turdagi koronavirus pandemiyasi sababli dunyo bo‘yicha 168 milliondan ortiq o‘spirin va bolalar ta’lim oluvchi maktablar deyarli bir yildan buyon butunlay yopiq. Bu haqda BMTning Bolalar fondi (YuNISEF) o‘tkazgan tadqiqotlarga tayanib “Korrespondent.net” xabar berdi.
14 ta mamlakatdagi maktablar 2020-yilning martidan 2021-yilning fevraligacha asosan yopiq bo‘ldi. Bu maktablarning uchdan ikki qismi Lotin Amerikasi va Karib dengizi havzasi mintaqasida joylashgan. U yerda ta’limning to‘xtatilishi tufayli aziyat chekkan maktab o‘quvchilari soni qariyb 98 millionga yetdi. Panama, Salvador, Bangladesh va Boliviyada maktablar eng uzoq muddat faoliyat ko‘rsatmadi.
“An’anaviy o‘qish imkoniga ega bo‘lmagan bolalar kundan kunga ortda qolmoqda. Biz yana bir yillik cheklovlarga, o‘quvchilarning to‘liq an’anaviy dars jarayonlari tiklanmasligiga yo‘l qo‘yolmaymiz. Maktablar faoliyatini davom ettirishi uchun barcha choralarni ko‘rish yoki ta’lim jarayonlarini tiklash rejalarida ushbu masalaga alohida ahamiyat berish kerak”, — dedi YuNISEF ijrochi direktori Genrietta For.
Uning so‘zlariga ko‘ra, maktablarning yopilishi o‘smirlar va bolalarning o‘qishi va sog‘lig‘i uchun salbiy oqibatlarga olib kelishi mumkin. Zaif va masofaviy o‘qish imkoniyatiga ega bo‘lmagan bolalarning hech qachon darslarga qayta olmaslik xavfi tobora ortib bormoqda, hatto ba’zida ular erta nikoh yoki bolalar mehnatiga majburlanmoqda.
Mavzuga doir:
Izoh (0)