Янги турдаги коронавирус пандемияси сабабли дунё бўйича 168 миллиондан ортиқ ўспирин ва болалар таълим олувчи мактаблар деярли бир йилдан буён бутунлай ёпиқ. Бу ҳақда БМТнинг Болалар фонди (ЮНИСЕФ) ўтказган тадқиқотларга таяниб «Korrespondent.net» хабар берди.
14 та мамлакатдаги мактаблар 2020 йилнинг мартидан 2021 йилнинг февралигача асосан ёпиқ бўлди. Бу мактабларнинг учдан икки қисми Лотин Америкаси ва Кариб денгизи ҳавзаси минтақасида жойлашган. У ерда таълимнинг тўхтатилиши туфайли азият чеккан мактаб ўқувчилари сони қарийб 98 миллионга етди. Панама, Салвадор, Бангладеш ва Боливияда мактаблар энг узоқ муддат фаолият кўрсатмади.
«Анъанавий ўқиш имконига эга бўлмаган болалар кундан кунга ортда қолмоқда. Биз яна бир йиллик чекловларга, ўқувчиларнинг тўлиқ анъанавий дарс жараёнлари тикланмаслигига йўл қўёлмаймиз. Мактаблар фаолиятини давом эттириши учун барча чораларни кўриш ёки таълим жараёнларини тиклаш режаларида ушбу масалага алоҳида аҳамият бериш керак», — деди ЮНИСЕФ ижрочи директори Генриетта Фор.
Унинг сўзларига кўра, мактабларнинг ёпилиши ўсмирлар ва болаларнинг ўқиши ва соғлиғи учун салбий оқибатларга олиб келиши мумкин. Заиф ва масофавий ўқиш имкониятига эга бўлмаган болаларнинг ҳеч қачон дарсларга қайта олмаслик хавфи тобора ортиб бормоқда, ҳатто баъзида улар эрта никоҳ ёки болалар меҳнатига мажбурланмоқда.
Изоҳ (0)