Samarqand viloyati Samarqand tumanida 2021-yilning 1-martidan 2-martiga o‘tar kechasi mast erkak tanishining boshiga aroq shishasi bilan urib, o‘ldirib qo‘ydi. Bu haqda Tergov departamenti xabar qildi.
Ma’lum qilinishicha, soat 00:30 atrofida “Sho‘rboycha” mahallasi hududida joylashgan “Chayxana” oshxonasida 48 yoshli erkak Yu.O. tanishi 34 yoshli S.B. bilan birgalikda spirtli ichimlik iste’mol qilib, mast holatda o‘zaro janjallashgan.
Shundan so‘ng S.B.ning boshiga Yu.O. aroq idishi bilan urgan. Zarb oqibatida S.B. o‘zini boshqara olmasdan, bino yerto‘lasiga yiqilib, hodisa joyida halok bo‘lgan.
Mazkur holat yuzasidan Samarqand tumani IIB huzuridagi tergov bo‘limi tomonidan Yu.O.ga nisbatan Jinoyat kodeksining 104-moddasi 3-qismi “d” bandi (odam o‘limiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilib, protsessual tartibda ushlangan. Hozirda tergov davom etmoqda.
Bundan avval Samarqandda qo‘shnisini o‘ldirish uchun qotil yollagan erkak qo‘lga olingani, mazkur viloyatdagi kafe yaqinida janjallashgan shaxslar bir-birlariga da’volari yo‘qligiga qaramay, 3 sutkaga qamalgani hamda Samarqandda ikki yigitning o‘zaro janjali birining pichoqlab o‘ldirilishi bilan yakunlangani haqida xabar berilgandi.
Izoh (0)