Andijonda homilador ayol uyida bosqinchilik qilib, uning taqinchoqlarini zo‘rlik bilan o‘g‘irlab ketgan shaxs qo‘lga olindi, deya xabar qilmoqda Tergov departamenti.
Qayd etilishicha, 2021-yilning 2-mart kuni soat 10:00 larda noma’lum shaxs yuzlariga niqob taqib olib, elektroshoker bilan qurollangan holda Marhamat tumani “Turon” mahallasida yashovchi, homilador bo‘lgan 28 yoshli N.T.ning xonadoniga g‘ayriqonuniy ravishda kiradi.
Bosqinchi N.T.dan taqib olgan tilla taqinchoqlarini berishini talab qilib, unga elektroshoker bilan hujum qiladi. U ayolning taqinchoqlarini zo‘rlik ishlatib olib, devor oshish yo‘li orqali uydan chiqib qochib ketayotgan vaqtida mahallada yashovchi fuqarolar tomonidan ushlanadi.
Olib borilgan tergovga qadar tekshiruv harakatlari davomida ushbu jinoyatni 26 yoshli M.M. sodir etganligi aniqlanib, tilla taqinchoqlar va elektroshoker moslamasi ashyoviy dalil tariqasida rasmiylashtirib olingan.
Mazkur holat yuzasidan Marhamat tumani IIB huzuridagi tergov bo‘linmasi tomonidan M.M.ga nisbatan Jinoyat kodeksining 164-moddasi 3-qismi “v” bandi (uy-joyga g‘ayriqonuniy ravishda kirgan holda bosqinchilik qilish) bilan jinoyat ishi qo‘zg‘atilib, gumon qilinuvchi tariqasida jalb qilingan. Hozirda tergov davom etmoqda.
Ta’kidlanishicha, Jinoyat kodeksining normalariga ko‘ra, mazkur jinoyatni sodir etgan shaxs 10 yildan 15 yilgacha ozodlikdan mahrum qilish bilan jazolanishi mumkin.
Bundan avval Rossiyada 23 yilni qamoqda o‘tkazgan o‘zbekistonlik Toshkentga qaytishi bilan yana ozodlikdan mahrum qilingani, Yangiyo‘lda homilador ayolni bog‘lab qo‘yib, bosqinchilik uyushtirgan 5 kishi qo‘lga olingani hamda Andijonda 28 yoshli ayolning uyiga bostirib kirib, pul talab qilgan fuqarolarga sud hukmi o‘qilgani haqida xabar berilgandi.
Izoh (0)