Toshkent viloyatining Yangiyo‘l shahrida 20 yoshli qizning uyida bosqinchilik qilgan besh kishiga jinoyat ishi qo‘zg‘atildi. Bu haqda IIV Tergov departamenti xabar berdi.

Foto: IIV Tergov departamenti

Ma’lum bo‘lishicha, 13-fevral kuni soat 03:00 larda noma’lum shaxslar Yangiyo‘l shahar, Ma’rifat ko‘chasida joylashgan 20 yoshli qiz N.Y.ning uyiga devordan oshish yo‘li bilan kirgan. Ular yuzlariga niqob va qo‘llariga rezina qo‘lqop kiygan holda qizni zo‘rlik ishlatish yo‘li bilan qo‘rqitib, yuz qismiga bir marotaba urib, og‘zini skotch bilan berkitgan. Qo‘shni yotoqxonada uxlab yotgan homilador 25 yoshli ayol Y.D.ning ham qo‘llarini skotch yordamida bog‘lab qo‘ygan.

Foto: IIV Tergov departamenti

So‘ng ushbu ayollarga tegishli jami 1320 dollarlik qimmatbaho buyumlarni bosqinchilik yo‘li bilan qo‘lga kiritib, hodisa joyidan yashiringan.

Foto: IIV Tergov departamenti

Olib borilgan tergovga qadar tekshiruv harakatlari davomida ushbu jinoyatni Zangiota tumani, “Zangiota” va “O‘rtaovul” mahallalarida yashovchi 26 yoshli Q.T., 33 yoshli L.F., 24 yoshli X.S., 24 yoshli D.T. va 23 yoshli A.A. sodir etgani aniqlanib, protsessual tartibda ushlangan.

Holat yuzasidan Toshkent viloyati IIBB huzuridagi Tergov boshqarmasi tomonidan ularga nisbatan Jinoyat kodeksining 164-moddasi 3-qismi “v” bandi (bosqinchilik) bilan jinoyat ishi qo‘zg‘atilib, gumon qilinuvchi tariqasida jalb qilingan. Hozirda tergov davom etmoqda.

Avvalroq Andijonda 28 yoshli ayolning uyiga bostirib kirib, qo‘li va og‘zini skotchlab pul talab qilgan ikki yigitga sud hukmi o‘qilgani haqida xabar berilgan edi.