Prezident Shavkat Mirziyoyev raisligida 3-mart kuni o‘tkazilgan yig‘ilishda davlat rahbari uy-joy qurilishi sifatini oshirish mas’uliyati bosh vazir o‘rinbosari Ochilboy Ramatov va viloyat hokimlariga yuklatilishini ta’kidladi. Yig‘ilishda Ochilboy Ramatov qabul qilinishi kutilayotgan uy-joy qurilishiga oid yangi farmon va o‘ziga yuklatilgan vazifalar bo‘yicha munosabat bildirdi, deya xabar bermoqda “Daryo” muxbiri.
“Imzolanadigan yangi farmon bo‘yicha amalga oshiriladigan qurilishlar natijasida qo‘shimcha 300 mingta ish o‘rni yaratilishi kutilmoqda. Bundan ham ko‘proq bo‘lishi mumkin. O‘tgan yili uy-joy qurilishi uchun joylar tanlangan edi. Ammo yangi talabga ko‘ra, infratuzilmani yaqinlashtirish uchun tanlangan joylar qayta ko‘rib chiqiladi.
Uy-joylar tannarxiga sement va temir katta ta’sir o‘tkazadi. Sement ishlab chiqarish bu yil 16-17 mln tonnaga yetkaziladi. Ammo qurilishlar hajmi ham joriy yilda ikki barobar oshishi kutilmoqda va bizda 40 mln tonnaga yaqin sement zarurati bo‘ladi. Shuning uchun sement va temirga talab keskin oshyapti. Bundan tashqari, temir narxi ham oshib bormoqda. Shu bois ishlab chiqarish korxonalaridan ushbu ikki mahsulotni to‘g‘ridan to‘g‘ri sotib olishni yo‘lga qo‘ysak, shu masalada imkoniyat yaratilsa”, — dedi bosh vazir o‘rinbosari.
Davlat rahbari Ramatovning taklifiga munosabat bildirarkan, bu bo‘yicha shaffof tizim yaratish kerakligini qayd etdi.
“Bosh vazir bilan birga bu masalani yaxshilab o‘rganib chiqinglar, shaffof tizim yaratish kerak. Qo‘shimcha mablag‘ ajratishni ham o‘ylab ko‘ringlar. Muhimi, narx oshib ketmasin, uylar bahosi odamlar uchun og‘irlik qilmasin. Quruvchi qurib ketaveradi, lekin ertaga ekspluatatsiya qilish sizning zimmangizga tushadi. Uyni faqat qurish emas, unga boshqaruv kompaniyalari orqali xizmat ko‘rsatishni ham sifatli yo‘lga qo‘yishimiz lozim. Kerak bo‘lsa, bu bo‘yicha ham alohida qaror qabul qilamiz”, — dedi Shavkat Mirziyoyev.
Avvalroq uy-joy qurilish sifatini oshirish mas’uliyati Ochilboy Ramatov va viloyat hokimlariga yuklatilgani, O‘zbekistonda 2021-yil yakunigacha og‘ir turmush sharoitiga tushib, boshpanasiz qolgan 1000 nafar ayol ijtimoiy ijara asosida uy-joy bilan ta’minlanishi hamda Shavkat Mirziyoyev quruvchi tashkilotlarga pandemiya davrida berilgan imtiyozlar 2021-yil oxirigacha uzaytirilishini ta’kidlagani haqida xabar berilgandi.
Izoh (0)