Dehqonobodda Shahrisabzdan kelayotgan yuk mashinasida yong‘in chiqdi

Dehqonobod tumanining “Bibiqorasoch” mahallasida Shahrisabz shahridan harakatlanib kelayotgan “KamAZ”da yong‘in chiqdi. Bu haqda tuman hokimligi axborot xizmati ma’lum qilgan.

Bugun, 4-mart kuni soat 15:45 da sodir bo‘lgan yong‘in qisqa fursatda tuman Favqulodda vaziyatlar xodimlari tomonidan o‘chirilgan. Yong‘indan hech kim jabrlanmagan.

Hokimlik axborot xizmatining ma’lum qilishicha, G‘uzor tumanida yashovchi fuqaro “KamAZ” yuk mashinasida Shahrisabz shahridan qadoqlangan ichimlik suvini Termiz shahriga olib ketayotgan bo‘lgan.

Ayni paytda yong‘inning kelib chiqish sabablari va yetkazilgan moddiy zarar miqdori o‘rganilmoqda.