Президент Шавкат Мирзиёев раислигида 3 март куни ўтказилган йиғилишда давлат раҳбари уй-жой қурилиши сифатини ошириш масъулияти бош вазир ўринбосари Очилбой Раматов ва вилоят ҳокимларига юклатилишини таъкидлади. Йиғилишда Очилбой Раматов қабул қилиниши кутилаётган уй-жой қурилишига оид янги фармон ва ўзига юклатилган вазифалар бўйича муносабат билдирди, дея хабар бермоқда «Дарё» мухбири.
«Имзоланадиган янги фармон бўйича амалга ошириладиган қурилишлар натижасида қўшимча 300 мингта иш ўрни яратилиши кутилмоқда. Бундан ҳам кўпроқ бўлиши мумкин. Ўтган йили уй-жой қурилиши учун жойлар танланган эди. Аммо янги талабга кўра, инфратузилмани яқинлаштириш учун танланган жойлар қайта кўриб чиқилади.
Уй-жойлар таннархига цемент ва темир катта таъсир ўтказади. Цемент ишлаб чиқариш бу йил 16-17 млн тоннага етказилади. Аммо қурилишлар ҳажми ҳам жорий йилда икки баробар ошиши кутилмоқда ва бизда 40 млн тоннага яқин цемент зарурати бўлади. Шунинг учун цемент ва темирга талаб кескин ошяпти. Бундан ташқари, темир нархи ҳам ошиб бормоқда. Шу боис ишлаб чиқариш корхоналаридан ушбу икки маҳсулотни тўғридан-тўғри сотиб олишни йўлга қўйсак, шу масалада имконият яратилса», — деди бош вазир ўринбосари.
Давлат раҳбари Раматовнинг таклифига муносабат билдираркан, бу бўйича шаффоф тизим яратиш кераклигини қайд этди.
«Бош вазир билан бирга бу масалани яхшилаб ўрганиб чиқинглар, шаффоф тизим яратиш керак. Қўшимча маблағ ажратишни ҳам ўйлаб кўринглар. Муҳими, нарх ошиб кетмасин, уйлар баҳоси одамлар учун оғирлик қилмасин. Қурувчи қуриб кетаверади, лекин эртага эксплуатация қилиш сизнинг зиммангизга тушади. Уйни фақат қуриш эмас, унга бошқарув компаниялари орқали хизмат кўрсатишни ҳам сифатли йўлга қўйишимиз лозим. Керак бўлса, бу бўйича ҳам алоҳида қарор қабул қиламиз», — деди Шавкат Мирзиёев.
Аввалроқ уй-жой қурилиш сифатини ошириш масъулияти Очилбой Раматов ва вилоят ҳокимларига юклатилгани, Ўзбекистонда 2021 йил якунигача оғир турмуш шароитига тушиб, бошпанасиз қолган 1000 нафар аёл ижтимоий ижара асосида уй-жой билан таъминланиши ҳамда Шавкат Мирзиёев қурувчи ташкилотларга пандемия даврида берилган имтиёзлар 2021 йил охиригача узайтирилишини таъкидлагани ҳақида хабар берилганди.
Изоҳ (0)