Italiyaning shimolidagi Breshiya shahrida olimlar koronavirusning “nigeriyacha” shtammini aniqladi. Bu haqda Italiya virusologlar jamiyati prezidenti va mikrobiologik laboratoriya direktori Arnaldo Karuzo ma’lum qildi, deb yozadi “RBK”.
“Italiyada ilk marotaba biz mutatsiyaga uchragan shtammni aniqladik, bu xavotir tug‘diradi, chunki ushbu shtamm bugungi kunda mavjud bo‘lgan COVID-19 vaksinalariga chidamli bo‘lishi mumkin”, — dedi Karuzo.
Avvalroq Italiya hukumati koronavirus tarqalishi sababli joriy etilgan cheklovlarni kuchaytirgan edi. Cheklovlar asosan mamlakat shimolini, xususan, Milan va Turin shaharlarini qamrab oldi. Ikkala shahar ham 1-martdan boshlab xavflilik darajasi bo‘yicha “to‘q sariq” hududlar tasnifiga kiritildi. Xuddi shu toifaga mamlakatning markaziy qismida joylashgan va Adriatika dengiziga chiqish imkonini beradigan Marke mintaqasi kiritildi. Shu bilan birga, Molize va Bazilakata hududlari (mamlakatning markazi va janubida) “qizil” zonalar sifatida belgilanadi. Cheklov choralari qatoriga bar va restoranlarning yopilishi, mazkur shaharladan chiqishni taqiqlash kiradi. “Qizil” hududlarda maktablar onlayn ta’limga o‘tadi.
Ta’kidlanishicha, cheklovlarning kuchaytirlishiga koronavirusning yangi turlarini yuqtirish holatlarining ortishi sabab bo‘lgan.
Eslatib o‘tamiz, Nigeriyada 2020-yil dekabr oyi oxirida koronavirusning yangi turi aniqlandi. Afrika kasalliklar nazorati va profilaktikasi markazi direktori Jon Nkengasong yangi shtamm Nigeriyada koronavirusga chalinishlar soni o‘sishi fonida aniqlanganini aytgan. Ammo kasallanish holatlarining ortishiga aynan yangi shtamm sababchi bo‘lgani borasida hech qanday dalillar yo‘q, — deya ta’kidladi Nkengasong.
Avvalroq Shvetsiyalik olimlar onasi COVID-19 bilan kasallangan yangi tug‘ilgan chaqaloq organizmida SARS-CoV-2 virusining yangi mutatsiyasi mavjudligini aniqlagani haqida xabar berilgandi. Virus genomlari tekshirilganda bolaning tug‘ilishidan avval, ya’ni ona qornidaligi vaqtida koronavirusga chalingani aniqlangan.
Dastlabki tahlillar ona va chaqaloqning organizmidagi viruslar bir xil ekanligini ko‘rsatdi, biroq bir necha kun o‘tgach, shifokorlar chaqaloqdagi infeksiya populyatsiyasi o‘zgarganining guvohi bo‘ldi. Bolada dastlabki virusdan farqli yangi shtamm mavjudligi aniqlandi.
Izoh (0)