Andijonda 7 yoshli bolaning qo‘lidan telefonini aldab olib, o‘g‘irlab ketgan yigitga nisbatan jinoiy ish ochildi, deya xabar bermoqda Tergov departamenti.
Ma’lum qilinishicha, 2021-yilning 27-fevral kuni soat 19:15 larda noma’lum shaxs o‘zining boshqaruvidagi Spark rusumli avtomashinasida Oltinko‘l tumani “Ko‘makay” MFY hududida yo‘l chetida ketayotgan voyaga yetmagan 1-sinf o‘quvchisi 7 yoshli A.B.ning oldida to‘xtab, uning qo‘lidagi narxi 450 000 so‘mlik RedMi 5 rusumli uyali telefon apparatini bir marotaba qo‘ng‘iroq qilib olish uchun olib, hodisa joyidan qochib ketgan.
Olib borilgan tergovga qadar tekshiruv harakatlari davomida voyaga yetmagan A.B. ushbu Spark rusumli avtomashinaning davlat raqamini eslab qolib otasiga ma’lum qilgan.
Natijada ushbu jinoyatni 23 yoshli H.R. sodir etganligi aniqlanib, o‘z xohishi bilan talonchilik orqali qo‘lga kiritgan uyali telefon apparatini A.B.ning otasiga olib borib berganligi ma’lum bo‘lgan.
Mazkur holat yuzasidan Oltinko‘l tumani IIB huzuridagi Tergov bo‘linmasi tomonidan Husniddin R.ga nisbatan Jinoyat kodeksining 166-moddasi 1-qismi (talonchilik) bilan jinoyat ishi qo‘zg‘atilgan. Hozirda tergov davom etmoqda.
Bundan avval Namanganda o‘zidan bir yosh katta yigitni urib, telefonini olib qo‘ygan maktab o‘quvchilariga nisbatan jinoyat ishi qo‘zg‘atilgani, Farg‘onada o‘zgaga tegishli 44 mln so‘mlik 4 qop sochni tortib olganlar aniqlangani hamda Toshkentda 35 yoshli erkakni kaltaklab, telefonini olib qo‘ygan uch nafar shaxs qo‘lga olingani haqida xabar berilgandi.
Izoh (0)