Namangan shahri Davlatobod tumanida 18 yoshli yigitning telefonini olib qo‘yib, uni sotib yuborgan maktab o‘quvchilari ushlandi, deb xabar beradi Tergov departamenti.
Ma’lum qilinishicha, 24-fevral kuni soat 19:30 larda noma’lum shaxslar tumanning Shifokorlar ko‘chasi hududida 18 yoshli M.E.ni to‘xtatib, yuz qismiga bir marotaba urib, unga tegishli narxi bir million so‘mlik Huawei E62 rusumli uyali aloqa vositasini tortib olib, hodisa joyidan yashiringan.
Olib borilgan tergovga qadar tekshiruv harakatlari davomida ushbu jinoyatni 48-sonli maktabning 11-sinf o‘quvchilari 17 yoshli J.J., I.X. sodir etib, talonchilik yo‘li bilan qo‘lga kiritgan telefon apparatini 450 ming so‘mga sotib yuborganligi aniqlangan va ular protsessual tartibda ushlangan.
Mazkur holat yuzasidan Davlatobod tumani IIB huzuridagi tergov bo‘limi tomonidan J.J. va I.X.ga nisbatan Jinoyat kodeksining 166-moddasi 2-qismi “v” bandi (talonchilik) bilan jinoyat ishi qo‘zg‘atilgan.
Hozirda tergov harakatlari davom etmoqda.
Ma’lumot uchun, bu turdagi jinoyatlar uchun Jinoyat kodeksining normalariga ko‘ra, 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish jazosi tayinlanadi.
Avvalroq Toshkentda 35 yoshli erkakni kaltaklab, telefonini olib qo‘ygan uch nafar shaxs qo‘lga olingani, Marg‘ilonda o‘zidan bir yosh katta yigitning 4,1 million so‘mlik telefonini olib qo‘ygan 5 nafar voyaga yetmagan bolaga nisbatan jinoiy ish ochilgani to‘g‘risida xabar berilgandi.
Izoh (0)