Мана ҳаш-паш дегунча қиш ҳам ниҳоясига етиб қолди. Аммо қаҳрини охирги ҳафтага атаб қўйгани «қишнинг бир куни қолса ҳам қўрқ» деган ўгитни тасдиқлайди. Ўртоқлар, қишнинг илиганига ишониб қолманг, ҳали муддати охирига етмади.
Бу ҳафта қаттиқ совуқ билан кириб келди. Республика бўйича кучли шамол келиб, ёмғир ёғди. Қамчиқ довонидан қор уриб бергани сабабли фожиа содир бўлди: икки машина ҳандаққа тушиб кетди. Самарқанд ва Қашқадарёни боғловчи Тахтақорача довонида кучли қор ёғгани сабабли автомобиллар ҳаракати тўхтатилди. Тошкент шаҳрида эса даставвал ёмғир, кейин қор ёғиб берди. Ноқулай об-ҳаво шароити сабабли 25 февраль санасидаги Тошкентдан қатнайдиган барча шаҳарлараро автобус қатновлари бекор қилинди. Совуқ ҳаво доимгидек газ қуйиш шохобчаларини ҳам бўғиб қўйди: газ қуйиш вақтига чеклов ўрнатилди.
Январь ойи охири ва февраль ойи ўрталарида кузатилган аномал иссиқ об-ҳаво мевали дарахтларнинг эрта гуллашига сабаб бўлди. Бироқ об-ҳаво кескин совиб, қор ёғиши туфайли мевали дарахтлар куртаклари ва гуллари хавф остида қолди. Бу мева ҳосилига салбий таъсир кўрсатиши ҳисоблаб чиқилди. Боғбонлар гилос, ўрик, узум ва бодом ҳосилидаги йўқотишларни 30 фоиздан 80 фоизгача баҳоламоқда. Бу уларнинг нархига ҳам таъсир қилиши мумкин.
Telegram-каналларда машинасининг тасмасини алмаштиргунича қулоғи музлаб қолган қозоғистонлик ҳайдовчининг видеоси тарқалди. Дарҳақиқат, шимолдаги қўшниларимиз совуқдан янада қаттиқ азият чекди. Бизда эса доимгидек электр ва газ узилишлари юз берди, аммо одамлар ўрганиб кетгани учунми ёки «қиш охирлаб қолди-ку», дедими – ҳарқалай бу гал кўчага чиқишлар кузатилмади.
* * *
Ҳафта бошидаёқ Тошкентда коронавирус вакцинасини ташишга мўлжалланган махсус автомобиллар авария содир қилди. Олдиндаги Changan минивени кескин тормозланиши билан орқадагилар ҳам кескин тормозланган ва оқибатда бир-бирига урилиб кетган.
Соғлиқни сақлаш вазирлиги матбуот хизматининг ёзишича, 23 февраль куни ЮНИСЕФ томонидан Санитария-эпидемиологик осойишталик ва жамоат саломатлиги хизмати учун 17 та музлаткичли юк машинаси ва 206 та минивен Changan автомобиллари топширилган. Машиналарнинг умумий қиймати 2 миллион долларни ташкил этади. Ушбу маблағ Вакциналар ва иммунизация бўйича глобал альянси (GAVI) томонидан соғлиқни сақлаш тизимини мукаммаллаштириш доирасида ажратилган.
Коронавирусга қарши эмлаш кетаётган бўлса-ю, эмлангингиз келмаса, нима бўлади? Бош вазир ўринбосари Беҳзод Мусаевнинг айтишича, ҳеч нима бўлмайди. Ўзбекистонда COVID-19 га қарши эмланишдан бош тортганларга ҳеч қандай чора кўрилмайди. Дарвоқе, Ўзбекистон аҳолини коронавирусга қарши оммавий эмлашда икки хил — Россиянинг Спутник V ҳамда хитой—ўзбек ҳамкорлигидаги ZF-UZ-Vac2001 вакциналаридан фойдаланишни режалаштирмоқда.
* * *
Тошкент вилоятида 2025 йилда бўлиб ўтадиган Осиё ўйинлари учун Олимпия шаҳарчаси қурилади. Бундай нуфузли мусобақага тайёргарлик ишлари бугундан бошланади.
Тошкент вилоятининг Қибрай туманида, «Тошкент-Шарқий» аэродроми яқинида 155 гектарлик боғ барпо этилади. Уни ишлаб чиқишда дунё мегаполисларидаги машҳур паркларнинг ландшафти, қулайликлари ўрганилган. Бу боғ фақат дарахтзор, бута ва гуллардан иборат ўзига хос дендропарк бўлиши кўзда тутилган. Бу пойтахт экологиясига катта таъсир кўрсатадиган, аҳоли ва меҳмонлар сайр қиладиган «яшил ҳудуд» бўлади. Мазкур боғнинг ёнида Олимпия шаҳарчаси қурилиши режалаштирилмоқда.
Маълумки, Осиё Олимпия кенгашининг қарорига кўра, 2025 йилда ёшлар ўртасидаги Осиё ўйинлари Тошкентда ўтказилади. Унда қитъадаги 45 та мамлакат ёшлари 20 га яқин спорт тури бўйича беллашади.
Чирчиқ дарёсининг 5 километрдан зиёд қисмида қирғоқларни тартибга келтириб, эшкак эшиш бўйича мусобақалар учун зарур шароит яратилади. Қибрай туманининг ушбу ҳудудида 2 та университет, шифохона, экспо, савдо ва кўнгилочар марказ бинолари жойлаштирилиши назарда тутилмоқда.
* * *
Ўтган ҳафта президент Наманганга борганида ночор маҳаллалардан бирига кириб, оқланмаган ва нураб қолган деворни кўрсатиб Наманган масъулларига танбеҳ берган эди. Ҳаммаси шу оқланмаган девордан бошланди. Шундан кейин Наманган вилояти ҳокими Шавкатжон Абдураззоқов шу маҳаллага кўчиб келиб ободонлаштиришини эълон қилди.
Наманган ҳокими бу ҳафта ростдан ҳам шу маҳаллага келиб ўрнашиши аниқ бўлди. Унга тез фурсатда контейнердан уй қурилди. 3 сотих майдонни эгаллаган уй маҳалла профилактика инспекторининг хизмат уйи қаршисида жойлашди. Бу ерда 12 метрли контейнер ва фуқаролар қабули учун мўлжалланган ихчам шийпон ўрнатилган. Ҳоким бу шийпончада фуқароларни қабул қилади. Қизиқувчан блогерлар бу вақтинчалик контейнер-уйга қанча маблағ кетганини ҳисоблашга ҳам уриниб кўрди.
Дайжестимиз ниҳоясига етди. «Дарё»да қолинг. Дунё ва Ўзбекистондаги воқеалардан энг биринчи хабардор бўлинг.
Изоҳ (0)