Dominikan prezidenti Luis Abinader Gaiti bilan chegarada devor qurmoqchi. O‘z rejasi haqida u kongressga murojaatida ma’lum qildi. Bu haqda Diario Libre xabar berdi.
Uning so‘zlariga ko‘ra, 2021-yilning ikkinchi yarmida mamlakat qo‘shni davlat bilan chegarada xavfsizlik choralarini kuchaytiradi. Ular “fizikaviy va texnologik vositalar”, shu jumladan, ikki qavatli devor, harakat datchiklari, yuzni aniqlash tizimlari, radarlar va infraqizil nurlanish tizimlarini o‘z ichiga oladi.
Devor yordamida davlat rahbari noqonuniy migratsiya, giyohvand moddalar savdosi va olib qochilgan avtomashinalarni sotish muammosiga barham berilishiga umid qilmoqda.
AQShning sobiq prezidenti Donald Trampning saylovoldi kampaniyasidagi va’dalaridan biri Meksika bilan chegarada uzunligi 1,6 ming kilometrga yaqin devor qurish edi. Biroq u ishni oxiriga yetkaza olmadi. Tramp devor qurilishi xarajatlarini Meksikaga to‘latishga va’da bergandi. Meksikaning buni rad etishi oxir-oqibat davlat rahbarining mablag‘ ajratishdan bosh tortgan kongressdagi demokratlar bilan ziddiyatiga olib keldi. Prezident rejalashtirilgan mablag‘ning atigi 20 foizini kongress tomonidan mudofaa uchun ajratilgan xarajatlarni qayta taqsimlash yordamida qo‘lga kiritishga muvaffaq bo‘ldi. AQShning amaldagi prezidenti Jo Bayden o‘zining inauguratsiyasidan so‘ng Meksika bilan chegarada devor qurilishini to‘xtatdi.
Izoh (0)