Tojikiston tashqi qarzining 96,5 foizdan ortig‘i bevosita hukumat qarzi bo‘lib, 2021-yil 1-yanvar holatiga ko‘ra, 3 milliard 132,4 million dollarni tashkil etadigan mazkur mablag‘ davlat xizmatlarining amalga oshirilishini ta’minlaydi. Bu haqda Asia-Plus xabar berdi.
Shuningdek, respublikaning tashqi qarzlari tarkibiga quyidagilar kiradi:
- davlat kafolati bilan olingan qarzlar — 96,3 million dollar;
- to‘lov balansini qo‘llab-quvvatlash uchun Xalqaro valyuta fondi (XVF)dan qarzdorlik — 11,3 million dollar;
- Tojikiston Milliy banki tomonidan Xitoydan olingan qarz — 2,0 million dollar;
- Milliy taraqqiyot banki tomonidan Islom taraqqiyot bankidan olingan qarz — 1,7 million dollar.
Tojikiston Moliya vazirligining ma’lumotlariga ko‘ra, 2020-yilda tashqi qarzga xizmat ko‘rsatish uchun 190 million dollardan ortiq budjet mablag‘lari ajratilgan bo‘lib, 2021-yilda asosiy tashqi qarzni moliyalashtirish uchun (foizlarsiz) qariyb 1,5 milliard somoniy (bugungi kurs bo‘yicha 133 million dollar) ajratish rejalashtirilgan.
Tojikistonning tashqi qarzlar bo‘yicha asosiy kreditori Xitoy (1,2 milliard dollar) hisoblanadi.
Mamlakatning xalqaro moliya bozorlarida davlat zayomlarini joylashtirish bilan bog‘liq qarzi 500 million dollarni tashkil etadi.
Shuningdek, Tojikistonning Jahon banki, Osiyo taraqqiyot banki, Islom taraqqiyot banki va XVFdan nisbatan katta miqdorda qarzlari mavjud.
Avvalroq Tojikiston hukumatiga davlat budjetini qo‘llab-quvvatlash uchun 2020-yilda xalqaro moliya institutlari tomonidan 342 million dollar (2020-yildagi o‘rtacha rasmiy kursi bo‘yicha, taxminan, 3,6 milliard somoniy) ajratilgani haqida xabar berilgandi. Tojikiston Moliya vazirligi ushbu mablag‘ ustuvor ijtimoiy sohani moliyalashtirishga sarflanganini ta’kidlagan.
Izoh (0)