AQSh Fuqaro aviatsiyasi ma’muriyati (FAA) Boeing kompaniyasiga 6,6 million dollar miqdorida jarima to‘lash majburiyatini yukladi. AQSh regulyatori korporatsiyani 2015-yilda tuzilgan xavfsizlik shartnomasi bo‘yicha o‘z majburiyatlarini bajarmaganlikda aybladi. Kompaniya jarima yuzasidan hali izoh bermadi, deb yozmoqda “Kommersant”.
“Boeing kelishuv shartnomasi bo‘yicha hech qaysi majburiyatini bajarmadi. Oqibatda FAA kompaniyani qo‘shimcha jarimalar bilan javobgarlikka tortmoqda. Men bir necha bor Boeing rahbarlariga kompaniya xavfsizlik va muvofiqlikni birinchi o‘ringa qo‘yishi kerakligini aytganman”, — dedi FAA rahbari Stiv Dikson o‘z bayonotida.
FAA 2015-yilgi kelishuv bo‘yicha majburiyatlarni bajarmaganligi sababli kompaniyaga nisbatan kechiktirilgan fuqarolik sanksiyalari miqdorini 5,4 million dollarga baholadi. Kompaniya FAA’da ko‘rib chiqilish bosqichida bo‘lgan ikkita alohida da’voni hal qilish uchun yana 1,21 million dollar to‘lashga rozi bo‘ldi.
2015-yilgi kelishuvga binoan, kompaniyaning ichki jarayonlariga o‘zgartirishlar kiritish majburiyatini olgan, ular orasida me’yoriy talablarga yanada qat’iy rioya qilish vazifasi ustuvor edi. Reuters ma’lumotlariga ko‘ra, 2015-yilda kompaniya o‘ziga nisbatan da’volarni hal qilish doirasida 12 million dollar jarima to‘lagan.
Eslatib o‘tamiz, 21-fevral kuni United Airlines aviakompaniyasining yo‘lovchi samolyoti parvoz paytida dvigatellaridan biri yonib ketganligi sababli AQShning Kolorado aeroporti Denver shahriga favqulodda qo‘ndi. Bortida 231 nafar yo‘lovchi va o‘n nafar ekipaj a’zolari bo‘lgan Boeing 777 samolyoti Denverdan 20-fevral kuni Gonoluluga uchgan. Oradan vaqt o‘tib, samolyot dvigatellaridan birida yong‘in chiqqan. Ekipaj zudlik bilan uchish aeroportiga qaytishga qaror qilgan. Qo‘nish paytida samolyot dvigateli qoplamasining bir qismi uzilib, Kolorado shtatning Brumfild shahridagi turar joy binolari hovlisiga tushgan.
Hodisadan so‘ng Boeing kompaniyasi butun dunyo bo‘ylab Pratt & Whitney 4000-112 dvigatellari bilan ishlaydigan 128 777 samolyotlari parvozini to‘xtatishini tavsiya qildi.
Ba’zi mamlakatlar, xususan, Buyuk Britaniya o‘z hududida ushbu turdagi dvigatel bilan ishlaydigan Boeing 777 samolyotlaridan foydalanishni taqiqladi.
Izoh (0)