Dunyoda COVID-19 qurbonlari soni 2,5 milliondan oshdi

Pandemiya boshidan buyon butun dunyoda 2,5 million kishi koronavirus oqibatida vafot etdi. Bu haqda virus tarqalishini real vaqtda kuzatib kelayotgan Jons Hopkins universiteti ma’lumotlarida keltirilgan.

COVID-19 qurbonlarining aksariyati quyidagi mamlakatlarga to‘g‘ri keladi:

• AQSh — 506,2 ming kishi;
• Braziliya — 249,9 ming;
• Meksika —182,8 ming;
• Hindiston — 156,7 ming;
• Buyuk Britaniya —122,3 ming;
• Italiya — 96,6 ming;
• Fransiya — 85,4 ming.

Jahon sog‘liqni saqlash tashkiloti (JSST) ma’lumotlariga ko‘ra, so‘nggi bir hafta ichida, 15—21-fevral, kunlari dunyoda koronavirus oqibatida 66,3 ming kishi vafot etdi. Ushbu ko‘rsatkich avvalgi haftaga nisbatan 20 foizga kam. JSST ma’lumotlariga ko‘ra, COVID-19’ning tarqalishi sur’ati sekinlashdi. O‘tgan hafta dunyo bo‘ylab 2,4 million kishida infeksiya aniqlangan, bu avvalgi haftaga nisbatan 11 foizga kam.Shuningdek, JSST Buyuk Britaniyada aniqlangan koronavirusning yuqumliroq turi o‘tgan hafta davomida yana yettita mamlakatda aniqlangani haqida xabar qilgan. Unga ko‘ra, 16-fevralda o‘tkazilgan so‘nggi yangilanishdan beri koronavirusning “britancha” shtammi yana yettita mamlakatda qayd etildi. 23-fevral holatiga ko‘ra, jami 101 ta mamlakat kasallik o‘z hududlariga olib kirilgani haqida ma’lum qilgan.

Bundan tashqari, Janubiy Afrikada paydo bo‘lgan shtammning tarqalish geografiyasi ham kengaygan. So‘nggi bir hafta ichida “afrikacha” shtamm yana beshta mamlakatda aniqlangan va mazkur shtamm qayd etilgan mamlakatlar soni jami 51 taga yetgan. JSST ushbu shtammdagi mutatsiyalar virusning immunitet tizimi ta’siridan qochishga yordam berishini ta’kidladi. Shuning uchun mazkur shtamm avval COVID-19 bilan kasallangan yoki koronavirusga qarshi emlanganlar uchun ham xavflidir.

Braziliya va Yaponiyada paydo bo‘lgan shtammlar esa yana sakkizta davlatda qayd etilgan. Umumiy hisobda ushbu shtammlar 29 ta mamlakatda aniqlangan.