Armaniston muxolifati o‘z va’dasini bajardi, miting ishtirokchilarining bir qismi Yerevan ko‘chalarini tark etmadi va tuni bilan parlament binosi yonida qoldi, deb xabar beradi “RBK”.
“RIA Novosti” hisob-kitoblariga ko‘ra, parlament yonida 200 ga yaqin odam qolgan. Boshqa manbalarga qaraganda, ularning soni bir necha yuz kishini tashkil qilmoqda. Namoyishchilar Bagramyan shohko‘chasini egallab olib, bir nechta chodirlar o‘rnatgan va gulxan yoqqan. Ular shu yerda posbonlik qilayotgan politsiyachilar bilan ziddiyatga bormagan.
Armanistonning muxolif yetakchilari bir kun avval kechqurun parlament yaqinidagi shohko‘chani to‘sib qo‘ygan holda, bosh vazir Nikol Pashinyanning iste’fosini talab qilib muddatsiz aksiya boshlashga chaqirgan edi.
Armaniston Qurolli Kuchlari rahbariyati 25-fevral kuni Pashinyanni iste’foga chiqishga da’vat etuvchi bayonot bilan chiqdi. “Armaniston bosh vaziri va hukumat inqirozli va hal qiluvchi vaziyatlarda munosib qarorlar qabul qilish imkoniyatiga ega emas”, — deya ma’lum qildi harbiylar.
Bu bayonotdan avval Pashinyan va Bosh shtab boshlig‘i o‘rinbosari Tiran Xachatryan o‘rtasida ziddiyat bo‘lib o‘tgan edi. Bosh shtab vakili Qorabog‘dagi mojaro vaqtida Rossiyaning “Iskander” majmualari raketalarining 10 foizga yaqinigina ishga tushganini aytgan bosh vazirning gaplarini tanqid ostiga olgan edi.
Pashinyan Bosh shtabning o‘z iste’fosi haqidagi talabini harbiy to‘ntarishga urinish deb atadi. U o‘z tarafdorlarini Yerevandagi Respublika maydoniga, parlament binosiga chaqirdi va Bosh shtab rahbari Onik Gasparyanning iste’fosi haqida e’lon qildi.
Mavzuga doir:
- Armaniston Bosh shtabi Pashinyanning iste’fosini talab qildi. Uning o‘zi buni harbiy to‘ntarishga urinish deb atadi va tarafdorlarini namoyishga chiqishga chaqirdi
- Armanistonda siyosiy vaziyat keskinlashdi. Harbiylar Nikol Pashinyanning iste’fosini talab qilmoqda. Yerevan markazida norozilik namoyishlari boshlandi. Asosiy voqealar
Izoh (0)