Yevropa Ittifoqi Venesuelaning hududdagi doimiy vakilini persona non grata deb e’lon qildi. Bunga sabab qilib respublikaning hamjamiyat vakiliga nisbatan xuddi shunday munosabatda bo‘lgani ko‘rsatilmoqda, deb yozadi “RBK”.
“Yevropa Kengashi bugun Venesuela Respublikasining Yevropa Ittifoqidagi elchixonasi rahbarini persona non grata deb e’lon qilishga qaror qildi. Bu Venesuela hukumatining Venesueladagi Yevroittifoq delegatsiyasi rahbarini persona non grata deb e’lon qilish to‘g‘risidagi qaroriga javobdir”, — deyiladi bayonotda.
Eslatib o‘tamiz, 22-fevral kuni Yevropa Ittifoqi Venesuela rasmiylariga qarshi yangi sanksiyalar e’lon qildi. Cheklovlar 19 nafar mansabdor, jumladan, Milliy saylov kengashi prezidenti Indira Alfonso, kengash vitse-prezidenti Leonardo Morales, Qurolli kuchlar strategik operatsiyalar qo‘mondonligi rahbari, admiral Remixio Sebalos Ichaso, shuningdek, Milliy assambleya a’zolari va sudyalarga nisbatan joriy etildi.
Bunga javoban Venesuela hukumati 24-fevral kuni Yevroittifoq elchisi Isabel Brilyante Pedrosoni persona non grata deb e’lon qildi va unga mamlakatdan chiqib ketish uchun 72 soat muhlat berdi.
Yevroittifoqning fikricha, Venesuelaning bunday xatti-harakatlari faqat mamlakatni yanada yakkalanishiga olib keladi.
Izoh (0)