АҚШ ҳукумати Boeing компаниясини яна 6,6 млн доллар жаримага тортди

АҚШ Фуқаро авиацияси маъмурияти (FАА) Boeing компаниясига 6,6 миллион доллар миқдорида жарима тўлаш мажбуриятини юклади. АҚШ регулятори корпорацияни 2015 йилда тузилган хавфсизлик шартномаси бўйича ўз мажбуриятларини бажармаганликда айблади. Компания жарима юзасидан ҳали изоҳ бермади, деб ёзмоқда «Коммерсантъ».

«Boeing келишув шартномаси бўйича ҳеч қайси мажбуриятини бажармади. Оқибатда FАА компанияни қўшимча жарималар билан жавобгарликка тортмоқда. Мен бир неча бор Boeing раҳбарларига компания хавфсизлик ва мувофиқликни биринчи ўринга қўйиши кераклигини айтганман», — деди FАА раҳбари Стив Диксон ўз баёнотида.

FАА 2015 йилги келишув бўйича мажбуриятларни бажармаганлиги сабабли компанияга нисбатан кечиктирилган фуқаролик санкциялари миқдорини 5,4 миллион долларга баҳолади. Компания FАА’да кўриб чиқилиш босқичида бўлган иккита алоҳида даъвони ҳал қилиш учун яна 1,21 миллион доллар тўлашга рози бўлди.

2015 йилги келишувга биноан, компаниянинг ички жараёнларига ўзгартиришлар киритиш мажбуриятини олган, улар орасида меъёрий талабларга янада қатъий риоя қилиш вазифаси устувор эди. Reuters маълумотларига кўра, 2015 йилда компания ўзига нисбатан даъволарни ҳал қилиш доирасида 12 миллион доллар жарима тўлаган.

Эслатиб ўтамиз, 21 февраль куни United Airlines авиакомпаниясининг йўловчи самолёти парвоз пайтида двигателларидан бири ёниб кетганлиги сабабли АҚШнинг Колорадо аэропорти Денвер шаҳрига фавқулодда қўнди. Бортида 231 нафар йўловчи ва ўн нафар экипаж аъзолари бўлган Boeing 777 самолёти Денвердан 20 февраль куни Гонолулуга учган. Орадан вақт ўтиб, самолёт двигателларидан бирида ёнғин чиққан. Экипаж зудлик билан учиш аэропортига қайтишга қарор қилган. Қўниш пайтида самолёт двигатели қопламасининг бир қисми узилиб, Колорадо штатнинг Брумфилд шаҳридаги турар жой бинолари ҳовлисига тушган.

Ҳодисадан сўнг Boeing компанияси бутун дунё бўйлаб Pratt & Whitney 4000-112 двигателлари билан ишлайдиган 128 777 самолётлари парвозини тўхтатишини тавсия қилди.

Баъзи мамлакатлар, хусусан, Буюк Британия ўз ҳудудида ушбу турдаги двигатель билан ишлайдиган Boeing 777 самолётларидан фойдаланишни тақиқлади.