Shavkat Mirziyoyev: “Yil yakuniga qadar qariyb 9 million nafar ayol chuqurlashtirilgan tibbiy ko‘rikdan o‘tkaziladi”

O‘zbekistonda ayollar o‘rtasida nafas olish, hazm qilish a’zolari, yurak-qon tomir tizimi kasalliklari yuqoriligicha qolmoqda. 2020-yili 207 nafar ayolda homilada tug‘ma nuqson aniqlangan. Bu haqda Prezident Shavkat Mirziyoyev raisligida o‘tkazilgan yig‘ilishda ta’kidlandi, deya xabar bermoqda “Daryo” muxbiri.

Yig‘ilishda davlat rahbari Sog‘liqni saqlash vazirligi rahbariyatiga viloyat, tuman va shahar hokimlari bilan birga, “ayollar daftari”ga kirgan 44 ming nafar xotin-qizni alohida nazoratga olib, ularni ikki hafta muddatda tibbiyot brigadalariga biriktirish bo‘yicha topshiriq berdi. Bunda kasallikning turiga qarab, tor doiradagi shifokorlarni jalb qilgan holda ularni davolashni boshlash zarurligi qayd etildi.

“Tibbiy himoyaga muhtojlar nisbatan eng ko‘p Toshkent va Jizzax viloyatlarida – 5 ming nafardan, Toshkent shahri va Samarqandda – 4 ming nafardan, Surxondaryo va Farg‘onada – 3,5 mingta, Andijonda – 3 mingtani tashkil qiladi. Tuman (shahar)lar kesimida nisbatan ko‘p Forishda – 2 ming nafar, Buxoro va Beshariq tumanlarida – 1 ming nafardan, Paxtaobodda – 800 nafar.

Respublika Xotin-qizlar jamoatchilik kengashi Tanzila Norboyeva, sog‘liqni saqlash vaziri o‘rinbosari Elmira Bositxonova 2021-yil yakuniga qadar qariyb 9 million nafar xotin-qizni chuqurlashtirilgan tibbiy ko‘rikdan, jumladan, ularni ko‘krak bezi va ayollar kasalliklari saratoni skriningidan o‘tkazishi hamda kasallik aniqlanganlarini maqsadli sog‘lomlashtirish choralarining ko‘rilishiga shaxsan mas’ul bo‘ladi. Ushbu ishlarni tizimli va mahallabay tashkil etish bo‘yicha bir oy muddatda qaror loyihasi ishlab chiqilishi zarur”, – dedi Shavkat Mirziyoyev.

Tadbirda ta’kidlanishicha, Qoraqalpog‘istonda – 39 ming, Andijonda – 79 ming, Buxoroda – 41 ming, Jizzaxda – 37 ming, Navoiyda – 22 ming, Qashqadaryoda – 85 ming, Namanganda – 75 ming, Samarqandda – 96 ming, Sirdaryoda – 21 ming, Surxondaryoda – 71 ming, Farg‘onada – 94 ming, Toshkent viloyatida – 71 ming, Xorazmda – 44 ming, Toshkent shahrida – 51 ming nafar homilador ayollar qat’iy nazoratga olinadi. Xotin-qizlar orasida onkologik kasalliklarni kamaytirish maqsadida Elmira Bositxonova 2021-yilda 323 ming nafar qizlarni odam papillomasi virusiga qarshi emlashni tashkillashtiradi.