“Normativ-huquqiy hujjatlar va ular loyihalarining korrupsiyaga qarshi ekspertizasini o‘tkazish tartibi to‘g‘risida”gi nizom 24-fevral kuni O‘zbekiston Adliya vazirligi ro‘yxatidan o‘tkazildi, deb xabar bermoqda vazirlik matbuot xizmati.
Xabarda aytilishicha, nizom bilan davlat organlari va tashkilotlari tomonidan cheklist to‘ldirish orqali korrupsiyaviy omillarni aniqlashni nazarda tutuvchi mutlaqo yangi tartib joriy etildi. Bunda hujjatning har bir normasi va qoidasi tahlil qilinib, korrupsiyaviy omil bor yoki yo‘qligi cheklistda aks ettiriladi.
Shu bilan birga, korrupsiyaviy omillar to‘liq qayta ko‘rib chiqildi hamda huquqni qo‘llovchilar va fuqarolarga ularning ma’nosi aniq, lo‘nda va batafsil misollar bilan yoritilgan metodika asosida tushuntirib berilmoqda.
Jumladan, qonunchilikda asossiz ravishda istisnolar kiritilishini nazarda tutish cheklandi, qabul qilinayotgan norma barcha uchun yagona va umumiy bo‘lishi belgilandi.
Normativ-huquqiy hujjat loyihalarini ishlab chiquvchilarga qulaylik yaratish maqsadida korrupsiyaviy omillarga aniq misollar keltirilgan.
“Endilikda loyihalarni korrupsiyaga qarshi ekspertizadan o‘tkazishda jamoatchilik keng jalb qilinadi. Bunda fuqarolar regulation.gov.uz portalida cheklist to‘ldirish orqali qonun hujjatlari loyihalari bo‘yicha o‘z fikr va mulohazalarini bildirishi mumkin”, — deb ta’kidlangan xabarda.
Bundan tashqari, amaldagi qonun hujjatlarining korrupsiyaga qarshi ekspertizasi hozirgi kunda samarali yo‘lga qo‘yilgan huquqiy monitoring tizimi doirasida o‘tkazilishi belgilangan.
Eslatib o‘tamiz, O‘zbekiston Transparency International tashkilotining 2020-yilda e’lon qilgan reytingida korrupsiya bo‘yicha 26 ball bilan 183 ta mamlakat orasida 146-o‘rinda qayd etilgandi. Mamlakat 7 pog‘onaga ko‘tarilgan.
Shavkat Mirziyoyev korrupsiyaga qarshi kurashning yangi tuzilmalarini tashkil qilish bo‘yicha 2020-yilda o‘tkazgan yig‘ilishda O‘zbekiston Transparency International indeksida oxirgi uch yilda 12 pog‘onaga ko‘tarilgan bo‘lsa-da, hali bu illat barham topmaganini ta’kidlagan edi. Prezident 2020-yil 29-dekabr kuni Oliy Majlisga yo‘llagan Murojaatnomasida “Korrupsiyaga toqatsizlik hayotimiz bir qismiga aylanishi kerak”, deb aytgandi. Davlat rahbari 2021-yil 27-yanvar kuni o‘tkazgan yig‘ilishda bosh prokurorga hududlarga korrupsiya bo‘yicha “tashxis qo‘yish” topshirig‘ini berdi.
Izoh (0)