Toshkentning Olmazor tumani Usta Shirin ko‘chasida joylashgan qandolat ishlab chiqarish sexida ish beruvchining aybi bilan voyaga yetmagan bolaning qo‘li dastgohga kirib ketdi. Bu haqda IIV Tergov departamenti xabar berdi.
Voqea 15-yanvar kuni soat taxminan 22:00 da yuz bergan. Sexda yollanma ishchi bo‘lib ishlovchi voyaga yetmagan 16 yoshli bola B.D. o‘ziga yuklatilgan vazifalarni bajarayotgan vaqtida qandolat mahsulotlarini bo‘laklarga bo‘lish uchun mo‘ljallangan dastgohga qo‘li kirib ketishi natijasida o‘rtacha og‘ir tan jarohati olgan.
Olib borilgan tergovga qadar tekshiruv harakatlari natijasida ushbu qandolat ishlab chiqarish sexida ish beruvchi 55 yoshli X.R. voyaga yetmagan B.D. bilan mehnatni muhofaza qilish bo‘yicha yo‘riqnoma o‘tkazmagani hamda bilim saviyasini tekshirish ishlarini tashkil etmagani, texnik xavfsizlik qoidalarini tushuntirmagani aniqlangan.
Holat yuzasidan Olmazor tumani bo‘yicha IIO FMB huzuridagi Tergov bo‘linmasi tomonidan ish beruvchi X.R.ga nisbatan Jinoyat kodeksining 257-moddasi 1-qismi (mehnatni muhofaza qilish qoidalarini buzish) bilan jinoyat ishi qo‘zg‘atilgan.
Hozirda tergov harakatlari davom etmoqda.
Izoh (0)