Ўзбекистон ташқи ишлар вазири Абдулазиз Комилов 25 февраль, пайшанба куни дипломатик миссиясини якунлаётган Туркиянинг фавқулодда ва мухтор элчиси Меҳмет Сурейя Эрни қабул қилди, дея хабар қилмоқда вазирлик матбуот хизмати.
Учрашувда Ўзбекистон—Туркия кун тартибининг долзарб масалалари муҳокама қилинди.
Олий даражадаги алоқалар, жумладан, 2020 йилда Анқара шаҳрида икки мамлакат давлат раҳбарлари раислигида бўлиб ўтган Ўзбекистон—Туркия стратегик ҳамкорлик кенгашининг биринчи йиғилиши доирасида эришилган келишувларни амалга ошириш жараёни муҳокама қилинди.
Шунингдек, турли даражаларда бўлиб ўтадиган икки томонлама тадбирлар жадвали ва кун тартиби юзасидан фикр алмашилди.
Вазир элчининг Ўзбекистондаги фаолияти самарали бўлганини қайд этди ва унга давлатлараро муносабатларни мустаҳкамлашга қўшган улкан ҳиссаси учун миннатдорлик билдирди.
Меҳмет Сурейя Эр, ўз навбатида, Туркия элчиси сифатидаги фаолияти давомида кўрсатилган ёрдам ва қўллаб-қувватлаш учун миннатдорчилик билдирди.
Бундан аввал Абдулазиз Комилов Афғонистон президенти қабулида бўлиб, унга Шавкат Мирзиёевнинг мактубини топширгани, Тожикистон президенти Эмомали Раҳмон, Қозоғистон президенти Қосим-Жомарт Тўқаев ҳамда Туркманистон президенти Гурбангули Бердимуҳамедов билан учрашгани ҳақида хабар берилганди.
Изоҳ (0)