Айни пайтда Президент Шавкат Мирзиёев раислигида ўтказилаётган йиғилишда давлат раҳбари хотин-қизлар муаммоларини ўрганиш ва манзилли ишлаш мақсадида мутлақо янги тизим яратилгани ҳамда «аёллар дафтари» жорий этилганини таъкидлади, дея хабар бермоқда «Дарё» мухбири.
«Ҳудудларда бевосита 6,4 миллион нафар аёллар билан мулоқот қилиш орқали 9 та мезон асосида ‘аёллар дафтариъга 433 минг нафар аёллар киритилиб, электрон база шакллантирилди. Шундан 253 минг нафари – ишсизлар, 44 минг – тиббий, 48,5 минг – ҳуқуқий ва психологик ёрдамга муҳтожлар, 37 минг – боқувчисини йўқотган, 33,5 минг – ногиронлиги бўлганлар (шундан 4,5 минг – уй-жойини таъмирлашга муҳтож), 9 минг – нотурар жойда яшовчилар, 8 минг – ногиронлиги бўлган фарзандини тарбиялаётган ёлғиз аёлларни ташкил этади.
Бугунги кунга қадар республика комиссияси томонидан ‘аёллар дафтари’га киритилган 80 минг нафар хотин-қизларнинг (19 фоиз) муаммолари 3 ойда ҳал этилди. Энди ишни ‘маҳаллабай’ ташкил этишда маҳалла раиси, унинг хотин-қизлар бўйича ўринбосари бошчилигидаги Аёллар маслаҳат кенгашлари хотин-қизлар муаммоларини ‘хонадонбай’ аниқлаб, сектор раҳбарлари олдига аниқ ва лўнда масалаларни қўйиши шарт», – деди Президент.
Давлат раҳбари сектор раҳбарлари, ҳокимларнинг хотин-қизлар бўйича маслаҳатчиси билан бирга, аниқланган муаммоларнинг ечими бўйича «Йўл хариталари»ни ишлаб чиқиб, маҳаллий кенгашларга киритиши, ижроси бўйича ҳар ойда халқ вакилларига ҳисобот беришини қайд этди.
Мавзуга доир:
Изоҳ (0)