Shavkat Mirziyoyev ayollarning ishlashini taqiqlaydigan erkaklar haqida fikr bildirdi

Prezident Shavkat Mirziyoyev 18-fevral kuni Namangan viloyatiga ikki kunlik tashrifi davomida “Dashtbog‘” kichik sanoat zonasiga tashrif buyurdi.

Davlat rahbari maxsus kiyimlar va erkaklar ko‘ylagi tikish bilan shug‘ullanuvchi Dream linet tekstil kompaniyasi ishi bilan tanishdi. Bu yerda 120 nafar ayol va erkaklar ishlamoqda.

“Gazeta.uz”ning yozishicha, Shavkat Mirziyoyev kompaniya rahbari bilan suhbatda muhim masala — ayollarning ishlashini taqiqlaydigan erkaklar haqida fikr bildirdi. Prezident bunday illatlar bilan yangi ish o‘rinlari va munosib mehnat sharoitlarini yaratish orqali kurashish kerakligiga urg‘u berdi.

“Eri ruxsat bermasa, deyapti. Hozir Namanganda mana shu ibora paydo bo‘lyapti. Bu ibora bilan ham kurashishimiz kerak. Nimaga desangiz, hammamiz teng bo‘lib, ayollarimizni ham munosib ish bilan ta’minlashimiz kerak. Sizga o‘xshagan 20−30 ta tadbirkor hokimga ko‘makchi bo‘lsa bo‘ldi, mening bunday yurishim kerakmas — men ham davlat ishlari bilan shug‘ullanaveraman”, — degan Prezident “Maxsus rakurs”ning navbatdagi sonida.

Shavkat Mirziyoyev mehnat migratsiyasi masalasiga ham alohida to‘xtalib o‘tgan.

“Hali ko‘p-ko‘p mana shu fuqarolarimiz, sizlarni qo‘shnilaring, ko‘plarni turmush o‘rtoqlari chetda yuribdi. Mening eng katta maqsadim, qancha og‘ir bo‘lmasin, ularni sekin-sekin o‘zimizning bag‘rimizga, o‘zimizning mahallamizga, o‘zimizning uyimizga qaytarib olib kelish. Og‘ir, lekin baribir shu marralarni oldimizga qo‘yishimiz kerak”, — deb ta’kidlagan davlat rahbari.

2019-yil 1-maydan boshlab O‘zbekistonda ayollarni ayrim tarmoqlarda yoki kasblarda ish bilan ta’minlashga qo‘yilgan taqiqlar bekor qilingan edi.