Toshkent viloyatida 2025-yilda bo‘lib o‘tadigan Osiyo o‘yinlari uchun Olimpiya shaharchasi quriladi

Prezident Shavkat Mirziyoyev 25-fevral, payshanba kuni Toshkent viloyatida amalga oshiriladigan bunyodkorlik loyihalari taqdimoti bilan tanishdi.

Ulardan biri — Toshkent viloyatining Qibray tumanida, “Toshkent-Sharqiy” aerodromi yaqinida 155 gektarlik bog‘ barpo etish loyihasi. Uni ishlab chiqishda dunyo megapolislaridagi mashhur parklarning landshafti, qulayliklari o‘rganilgan. Bu bog‘ faqat daraxtzor, buta va gullardan iborat o‘ziga xos dendropark bo‘lishi ko‘zda tutilgan. Bu poytaxt ekologiyasiga katta ta’sir ko‘rsatadigan, aholi va mehmonlar sayr qiladigan “yashil hudud” bo‘ladi.

Mazkur bog‘ning yonida Olimpiya shaharchasi qurilishi rejalashtirilmoqda. Ma’lumki, Osiyo Olimpiya kengashining qaroriga ko‘ra, 2025-yilda yoshlar o‘rtasidagi Osiyo o‘yinlari Toshkentda o‘tkaziladi. Unda qit’adagi 45 ta mamlakat yoshlari 20 ga yaqin sport turi bo‘yicha bellashadi.

Qayd etilishicha, bunday nufuzli xalqaro musobaqa O‘zbekiston tarixida birinchi marotaba o‘tkaziladi. Davlat rahbari bu mamlakatga ko‘rsatilgan katta ishonch ekanini, ushbu musobaqaga hozirdan boshlab puxta tayyorgarlik ko‘rish kerakligini ta’kidlagan edi.

Shu maqsadda 160 gektar maydonda Olimpiya shaharchasi qurish bo‘yicha loyiha ishlab chiqilgan. Chirchiq daryosining 5 kilometrdan ziyod qismida qirg‘oqlarni tartibga keltirib, eshkak eshish bo‘yicha musobaqalar uchun zarur sharoit yaratish mo‘ljallangan. Uning bo‘ylarida esa 270 gektarlik park bunyod etilishi rejalashtirilgan.

Shuningdek, Qibray tumanining ushbu hududida 2 ta universitet, shifoxona, ekspo, savdo va ko‘ngilochar markaz binolari joylashtirilishi nazarda tutilmoqda.

Prezident loyihalarni sifat va qulaylik jihatidan takomillashtirish, inshootlarni qurishda jahondagi eng ilg‘or tajribalarni qo‘llash bo‘yicha ko‘rsatmalar berdi.

Bundan avval Shavkat Mirziyoyev raisligida qishloq va suv xo‘jaligi sohasida amalga oshiriladigan vazifalar yuzasidan videoselektor o‘tkazilgani, Toshkent shahar hokimligiga tirbandliklar yuzaga kelayotgan ko‘chalarda qo‘shimcha harakat yo‘nalishlarini ochish bo‘yicha topshiriq berilgani hamda davlat rahbari Navoiyda hamda gidroenergetika tarmog‘ida amalga oshiriladigan investitsiya loyihalari taqdimoti bilan tanishgani haqida xabar berilgandi.