Samsung kompaniyasi Galaxy Z Fold2 5G yoki Z Flip 5G flagman smartfonlariga ko‘proq e’tibor jalb qilishga yo‘naltirilgan yangi siyosatini e’lon qildi, deb xabar beradi IXBT.
Janubiy Koreya ishlab chiqaruvchisi ushbu qurilmani qaytarib berish muddatini 100 kungacha uzaytirdi. Hozircha mazkur siyosat faqat AQSh hududida amal qiladi.
Agarda mijoz 1200 dollar evaziga Galaxy Z Flip 5G yoki 2000 dollarga Galaxy Z Fold2 5G xarid qilsa, Samsung unga buklanadigan ekranli qurilma mos kelish-kelmasligini bilishi uchun 100 kun vaqt beradi. Odatda do‘konlar sotilgan tovarni 14 kun ichida qaytarib oladi, Samsung internet do‘konida esa 15 kungacha ruxsat bor.
Ushbu smartfon xaridorlari o‘zlariga ma’qul qurilmaga almashtirishda 550 dollargacha bo‘lgan mablag‘ni qaytarib olish huquqiga ega bo‘ladi. Bundan tashqari, xaridorlarga Samsung aksessuarlariga sarflash mumkin bo‘lgan 200 dollar beriladi. 100 kunlik muddat faqatgina bevosita Samsung internet do‘konlari orqali 1-aprelga qadar amalga oshirilgan xaridlarga taalluqli.
Agarda xaridor telefonni qaytarib topshirishni istasa, uning to‘lagan pullari to‘lig‘icha qaytarib beriladi. Samsung promokuponidan foydalanilib, 200 dollar sarflab yuborilsa, xaridor 200 dollar yoki aksessuarni qaytarishga majbur.
Avvalroq Samsung’ning buklanuvchi smartfonlari egalari ko‘ngilsiz muammodan shikoyat qila boshlagani, egiluvchan ekranlar sovuqqa chiday olmay, ishdan chiqayotgani to‘g‘risida xabar berilgandi.
Izoh (0)