Xitoyning Huawei kompaniyasi buklanuvchi ikkita ekranga ega flagmani — Mate X2’ni taqdim etdi, deb xabar beradi Hi-Tech.Mail.ru.
Bu Huawei’ning buklanadigan ekranga ega ikkinchi flagmani hisoblanadi, faqat bundan oldingi Mate X’ning konstruksiyasi boshqacha edi — bitta buklanadigan displey yig‘ilgan holatda ham tashqi tomonida qolardi. Shu kabi holatda qo‘ng‘iroqlarni amalga oshirish yoki yozish, ochilgan holatda esa brauzerdan foydalanish yoki video tomosha qilish mumkin edi.
Tashqi tomondagi displey zarbalarga u qadar bardoshli emas, shu sababli Mate X2’da boshqa formatdan foydalanilgan. Uning asosiy 8 dyuymli OLED displeyi ichkariga buklanadi, tashqi tomondagi ekran esa (6,45 dyuym) oddiy vazifalar uchun. Ikkala ekran ham 90 gertsli yangilanish chastotasini qo‘llab-quvvatlaydi. Huawei’ning va’da qilishicha, yangi flagmanda buklanadigan konstruksiya ancha mustahkam va uzoq muddat xizmat qiladi.
Ko‘rinishi jihatdan Mate X2 o‘zidan oldingi modeldan u qadar katta farq qilmaydi — bu qo‘l ostida ixcham korpusga ega katta ekranli qurilma bo‘lishini xohlagan qimmat gadjet. Bu kabi displeyda brauzerda ishlash, bir vaqtning o‘zida bir nechta dasturlarni ochish, o‘yin o‘ynash, roliklar ko‘rish, o‘qish va boshqa ko‘plab amallarni bajarish mumkin.
Smartfon Kirin 9000 flagman protsessorida ishlaydi — bu kabi chip Mate 40’ga ham o‘rnatilgan. Unga 8 Gb tezkor va 256/512 Gb ichki xotira o‘rnatiladi, akkumulyator sig‘imi 4500 mA/soatga teng bo‘lib, 55 vattli tezkor quvvatlanish funksiyasiga ega.
E’tiborli jihati — uning narxida. Buklanadigan ekranga ega smartfon Xitoyda 25-fevraldan 17 999 yuan (2800 AQSh dollari) narxida sotuvga chiqadi.
Avvalroq LG qurilma ekrani korpusdan tortib chiqariladigan “rulon-smartfon” tayyorlayotgani to‘g‘risida xabar berilgandi.
Izoh (0)