Samsung компанияси Galaxy Z Fold2 5G ёки Z Flip 5G флагман смартфонларига кўпроқ эътибор жалб қилишга йўналтирилган янги сиёсатини эълон қилди, деб хабар беради IXBT.
Жанубий Корея ишлаб чиқарувчиси ушбу қурилмани қайтариб бериш муддатини 100 кунгача узайтирди. Ҳозирча мазкур сиёсат фақат АҚШ ҳудудида амал қилади.
Агарда мижоз 1200 доллар эвазига Galaxy Z Flip 5G ёки 2000 долларга Galaxy Z Fold2 5G харид қилса, Samsung унга букланадиган экранли қурилма мос келиш-келмаслигини билиши учун 100 кун вақт беради. Одатда дўконлар сотилган товарни 14 кун ичида қайтариб олади, Samsung интернет дўконида эса 15 кунгача рухсат бор.
Ушбу смартфон харидорлари ўзларига маъқул қурилмага алмаштиришда 550 долларгача бўлган маблағни қайтариб олиш ҳуқуқига эга бўлади. Бундан ташқари, харидорларга Samsung аксессуарларига сарфлаш мумкин бўлган 200 доллар берилади. 100 кунлик муддат фақатгина бевосита Samsung интернет дўконлари орқали 1 апрелга қадар амалга оширилган харидларга тааллуқли.
Агарда харидор телефонни қайтариб топширишни истаса, унинг тўлаган пуллари тўлиғича қайтариб берилади. Samsung промокупонидан фойдаланилиб, 200 доллар сарфлаб юборилса, харидор 200 доллар ёки аксессуарни қайтаришга мажбур.
Аввалроқ Samsung’нинг букланувчи смартфонлари эгалари кўнгилсиз муаммодан шикоят қила бошлагани, эгилувчан экранлар совуққа чидай олмай, ишдан чиқаётгани тўғрисида хабар берилганди.
Изоҳ (0)