Тошкентдаги Тиббиёт ходимларининг касбий малакасини ривожлантириш марказининг кўп тармоқли клиникасида ишловчи ҳамширага компенсация тўланишида солиқ тўловлари учун асоссиз ушлаб қолинган салкам 12 миллион сўм ундириб берилди. Бу ҳақда прокуратура бошқармасига таяниб, «Xabar.uz» хабар берди.
Аниқланишича, фуқаро Д.Юлдашева Тиббиёт ходимларининг касбий малакасини ривожлантириш марказининг кўп тармоқли клиникасида ҳамшира сифатида ишлаб, шу шифохонада 2020 йилнинг 8 июлидан бошлаб коронавирус инфекцияси билан касалланган беморларни даволаш ишларига жалб этилган.
Д.Юлдашева бўлимда 2020 йилнинг 24 июнидан 24 июлига қадар катта ҳамшира лавозимида фаолият олиб борган. 20 июль куни олинган таҳлил натижасига кўра, унда коронавируснинг манфий натижаси аниқланган.
Ўзбекистон Президентининг 2020 йил 26 мартдаги «Коронавирус инфекцияси тарқалишига қарши курашишга жалб қилинган тиббиёт ва санитарияепидемиология хизмати ходимларини қўллаб-қувватлашга оид қўшимча чора-тадбирлар тўғрисида»ги қарорининг иловасида коронавирус инфекцияси тарқалишига қарши курашиш доирасида беморлар билан ишлаган вақтида коронавирус инфекциясини юқтириб олган тиббиёт ходимларига бир марталик тўлов тўланиши кўрсатилган.
1-сонли Республика клиник шифохонаси маъмурияти Соғлиқни сақлаш вазирлигининг 2020 йил 25 ноябрдаги буйруғини бажариш мақсадида 2020 йил 7 декабрь куни Д.Юлдашевага бир марталик тўловлар бўйича 125 миллион сўм маблағ ажратилиши сўралган.
Шу боис унинг шахсий ҳисоб рақам карточкасига 2020 йил 31 декабрда 88 миллион сўм пул ўтказилган. Қолган 25 миллион сўм ягона ижтимоий тўловга, 11,9 миллион сўми эса жисмоний шахслардан олинадиган даромад солиғига ва 100 минг сўм жамғариб бориладиган пенсия бадалига ўтказилган.
Ўрганиш жараёнида қонун бузилиши ҳолатига чек қўйилиб, Д.Юлдашевага тўланмай қолган 11,9 миллион сўм компенсация тўлаб берилиши таъминланган.
Мавзуга доир: Ўзбекистонда коронавирусга чалиниш ҳолатлари кўпайгани ҳақидаги хабарлар асоссиз эканлиги маълум қилинди
Коронавирус инфекциясига қарши курашиш доирасида беморлар билан ишлаган вақтида коронавирус инфекциясини юқтириш натижасида оғир аҳволга тушган ва соғлиғи тикланмаган тақдирда тиббиёт, санитария-эпидемиология хизмати ва бошқа ходимларга ёки уларнинг оила аъзоларига эса 250 миллион сўм миқдорида бир марталик тўловлар тўланади.
Изоҳ (0)