Koronavirus pandemiyasi 2022-yilning boshida nihoyasiga yetadi, deya ma’lum qildi Jahon sog‘liqni saqlash tashkiloti (JSST) Yevropa mintaqaviy byurosi rahbari Xans Klyuge. Bu haqda u Daniyaning DR telekanaliga bergan intervyusida aytib o‘tdi, deb yozmoqda “RBK”.
“Eng yomon ssenariy ortda qoldi. Virus endigina tarqala boshlagan 2020-yilga nisbatan biz hozir ushbu infeksiya haqida ko‘p ma’lumot bilamiz”,— dedi Klyuge.
Klyugening so‘zlariga ko‘ra, virus tarqalishda davom etadi, ammo cheklovlarga ehtiyoj qolmaydi. Shu bilan birga, bu faqat taxmin, aniq natijani hali aytib bo‘lmaydi.
Koronavirusning yangi mutatsiyalariga kelsak, bu odatiy jarayon, chunki virus odamlarga moslashishga harakat qiladi, deydi tashkilot vakili. Uning ta’kidlashicha, JSST virusning yangi turlari tez tarqalayotgani bois COVID-19’ga qarshi vaksinalarning samaradorligini diqqat bilan kuzatmoqda. Shuningdek, agar zarur bo‘lsa, yangi mutatsiyalarga qarshi kurashish uchun vaksinalarni o‘zgartirish mumkin, ammo ularni noldan yaratishga hojat yo‘q.
Fevral oyining boshlarida Britaniyaning AstraZeneca farmakologik kompaniyasi o‘zining koronavirusga qarshi vaksinasni Janubiy Afrikada paydo bo‘lgan shtammga qarshi kurashish uchun moslashtirishga va’da bergandi. Vaksinani ishlab chiqishga rahbarlik qilgan Oksford universiteti xodimi Sara Gilbertning so‘zlariga ko‘ra, yaratib bo‘lingan texnologiyani osonlikcha moslashtirish mumkin, vaksinaning yangi versiyasini esa kuzga qadar tayyorlasa bo‘ladi.
Avvalroq Bloomberg koronavirus pandemiyasi qachon tugashini hisoblab chiqqan edi. Hisob-kitoblar uchun vaksinalar hajmi asos qilib olindi, chunki ilmiy jamoatchilik fikriga ko‘ra, pandemiyani yengish uchun dunyo aholisining 70—85 foizi emlanishi kerak. Hisob-kitoblar o‘zgarishi mumkin, chunki ayrim mamlakatlar virusni tezroq yengadi, deydi tahlilchilar. Masalan, dunyodagi emlash darajasi eng yuqori bo‘lgan Isroilda emlanganlar soni bor-yo‘g‘i ikki oy ichida 75 foizni tashkil qiladi. AQShda esa mazkur ko‘rsatkich 2022-yilga kelibgina 75 foizga yetadi.
Shuningdek, JSST dunyoda COVID-19 bilan kasallanish holatlari kamayganini ma’lum qilgan.
Izoh (0)