Коронавирус пандемияси 2022 йилнинг бошида ниҳоясига етади, дея маълум қилди Жаҳон соғлиқни сақлаш ташкилоти (ЖССТ) Европа минтақавий бюроси раҳбари Ханс Клюге. Бу ҳақда у Даниянинг DR телеканалига берган интервьюсида айтиб ўтди, деб ёзмоқда «РБК».
«Энг ёмон сценарий ортда қолди. Вирус эндигина тарқала бошлаган 2020 йилга нисбатан биз ҳозир ушбу инфекция ҳақида кўп маълумот биламиз»,— деди Клюге.
Клюгенинг сўзларига кўра, вирус тарқалишда давом этади, аммо чекловларга эҳтиёж қолмайди. Шу билан бирга, бу фақат тахмин, аниқ натижани ҳали айтиб бўлмайди.
Коронавируснинг янги мутацияларига келсак, бу одатий жараён, чунки вирус одамларга мослашишга ҳаракат қилади, дейди ташкилот вакили. Унинг таъкидлашича, ЖССТ вируснинг янги турлари тез тарқалаётгани боис COVID-19’га қарши вакциналарнинг самарадорлигини диққат билан кузатмоқда. Шунингдек, агар зарур бўлса, янги мутацияларга қарши курашиш учун вакциналарни ўзгартириш мумкин, аммо уларни нолдан яратишга ҳожат йўқ.
Февраль ойининг бошларида Британиянинг AstraZeneca фармакологик компанияси ўзининг коронавирусга қарши вакцинасни Жанубий Африкада пайдо бўлган штаммга қарши курашиш учун мослаштиришга ваъда берганди. Вакцинани ишлаб чиқишга раҳбарлик қилган Оксфорд университети ходими Сара Гильбертнинг сўзларига кўра, яратиб бўлинган технологияни осонликча мослаштириш мумкин, вакцинанинг янги версиясини эса кузга қадар тайёрласа бўлади.
Аввалроқ Bloomberg коронавирус пандемияси қачон тугашини ҳисоблаб чиққан эди. Ҳисоб-китоблар учун вакциналар ҳажми асос қилиб олинди, чунки илмий жамоатчилик фикрига кўра, пандемияни енгиш учун дунё аҳолисининг 70—85 фоизи эмланиши керак. Ҳисоб-китоблар ўзгариши мумкин, чунки айрим мамлакатлар вирусни тезроқ енгади, дейди таҳлилчилар. Масалан, дунёдаги эмлаш даражаси энг юқори бўлган Исроилда эмланганлар сони бор-йўғи икки ой ичида 75 фоизни ташкил қилади. АҚШда эса мазкур кўрсаткич 2022 йилга келибгина 75 фоизга етади.
Шунингдек, ЖССТ дунёда COVID-19 билан касалланиш ҳолатлари камайганини маълум қилган.
Изоҳ (0)