Microsoft prezidenti Bred Smitning ma’lum qilishicha, kompaniyada AQSh federal hukumati muassasalariga va tijorat kompaniyalariga 2020-yil dekabr oyida uyushtirilgan yirik kiberhujumda Rossiya razvedkasining ishtiroki borligi to‘g‘risida dalillar mavjud. Smit bu haqda Senatning Razvedka qo‘mitasidagi yig‘ilishda aytib o‘tdi, deb yozmoqda “RBK”.
“Ayni paytda bizda Rossiya razvedkasiga ishora qiluvchi ishonchli dalillar mavjud, boshqalardan shubhalanishga olib keladigan belgilar yo‘q”, — dedi Smit.
Shu bilan bir vaqtda, kiberxavfsizlikka ixtisoslashgan Crowdstrike kompaniyasi rahbari Jorj Kurz uning kompaniyasida Moskvaning ushbu hujumga aloqadorligi to‘g‘risida ma’lumot yo‘qligini aytdi. FireEye kiberxavfsizlik kompaniyasi rahbari Kevin Mandia esa hujumda xakerlar qo‘llagan vositalar Rossiya foydalanadigan qurilmalarga o‘xshashligini ta’kidladi. “Xakerlik uchun ishlatiladigan vositalar Xitoy, Shimoliy Koreya yoki Eron foydalanadigan qurilmalarga o‘xshamaydi”, — dedi u.
Ma’lumot uchun AQSh hukumati muassasalari va kompaniyalarga qilingan xakerlik hujumi haqida 2020-yilning dekabrida ma’lum qilingan. Unga ko‘ra, hujum ortida Cozy Bear (APT29 sifatida ham ma’lum) guruhi turgan, uni Rossiya maxsus xizmatlari bilan bog‘lashadi. The Washington Post hamsuhbatlarining aytishicha, xakerlar idora xodimlarining elektron pochtalariga kirgan. Bu 2020-yil bahorida bo‘lib o‘tgani taxmin qilinmoqda.
Kiberhujum, shu jumladan, AQSh hukumatiga ham xizmat ko‘rsatadigan SolarWinds IT-kompaniyasi yangilanmalari orqali yuz bergan. SolarWinds uning 2020-yil martidan iyunigacha chiqarilgan yangilanmalaridan “milliy davlat” o‘z maqsadlarida foydalangan bo‘lishi mumkinlgini tasdiqlagan.
The New York Times ushbu xakerlik hujumini so‘nggi besh yilda AQSh hukumati tizimlariga qilingan eng yirik hujumlardan biri deb atagan.
Rossiya prezidentining matbuot kotibi Dmitriy Peskovning aytishicha, Moskvaning kiberhujumlarga aloqasi yo‘q. U avvalroq Rossiya prezidenti Vladimir Putin Vashingtonga kiberxavfsizlik sohasida hamkorlik qilishni taklif qilgani, ammo taklif Amerika tomonidan javobsiz qoldirilganini ta’kidlagan.
Avvalroq AQSh Adliya vazirligi uch nafar dasturchini (Shimoliy Koreya fuqarolari) ommaviy xakerlik hujumini uyushtirib, 1,3 milliard dollar qiymatga ega pul va kriptovalyuta o‘g‘irlaganlikda ayblagan edi. Hujum banklardan tortib Gollivud kinostudiyalarini o‘z ichiga oluvchi bir qator kompaniyalarga uyushtirilgan.
Mavzuga doir:
Izoh (0)