Qatar futbol bo‘yicha 2022-yilgi Jahon Chempionatini o‘tkazish huquqini qo‘lga kiritganidan buyon o‘tgan o‘n yil mobaynida mamlakatda Hindiston, Pokiston, Nepal, Bangladesh va Shri-Lankadan kelgan 6500 dan ortiq mehnat muhojiri halok bo‘ldi. Bu haqda The Guardian gazetasi ushbu mamlakatlar hukumatlari taqdim etgan ma’lumotlarga tayanib xabar berdi, deb yozadi Meduza.
2011—2020-yillar davomida Qatarda Hindiston, Bangladesh, Nepal va Shri-Lankadan chiqqan 5927 nafar muhojir halok bo‘lgan. Bundan tashqari, Pokistonning Qatardagi elchixonasi ma’lumotlariga ko‘ra, 2010—2020-yillarda mamlakatda 824 nafar pokistonlik ishchi halok bo‘lgan.
The Guardian yozishicha, halok bo‘lgan muhojirlarning umumiy soni bundan ham yuqori bo‘lishi mumkin, chunki nashr tomonidan yig‘ilgan ma’lumotlar boshqa mamlakatlar, shu jumladan, Filippin va Keniyadan kelgan ko‘plab muhojirlar haqidagi axborotni hisobga olmaydi. Bundan tashqari, 2020-yil oxirida yuz bergan o‘limlar haqidagi ma’lumotlar ham qamrab olinmagan.
Qayd etilgan o‘limlar ish faoliyati davomida yoki ish joyida yuz bergan o‘limlar deb hisoblanmasa-da, halok bo‘lgan ishchilarning ko‘pchiligi Jahon Chempionatining infratuzilma loyihalarida band bo‘lgani ehtimoli katta, dedi Fors ko‘rfazi mamlakatlarida mehnat qiluvchilar huquqlariga ixtisoslashgan FairSquare Projects huquqni himoya qilish tashkiloti direktori Nik Makgixan. “2011-yildan buyon vafot etgan mehnat muhojirlarining katta qismi Qatar futbol bo‘yicha Jahon Chempionatini o‘tkazish huquqini qo‘lga kiritgani uchungina ushbu mamlakatga kelgan”, — dedi u.
Izoh (0)