Shavkat Mirziyoyev “Sun’iy intellekt texnologiyalarini jadal joriy etish uchun shart-sharoitlar yaratish chora-tadbirlari to‘g‘risida”gi qarorni imzolagani to‘g‘risida xabar berilgandi. Qarorga ko‘ra, O‘zbekistondagi ayrim OTMlarda “Sun’iy intellekt” yo‘nalishi bo‘yicha kadrlar tayyorlash yo‘lga qo‘yiladi, deb xabar beradi “Huquqiy axborot” kanali.
Shuningdek, hujjatga ko‘ra, Axborot texnologiyalari va kommunikatsiyalarini rivojlantirish vazirligi tuzilmasida Sun’iy intellekt texnologiyalarini joriy qilish va rivojlantirish departamenti tuzilgan. Tegishli tarkibda Sun’iy intellektni rivojlantirish bo‘yicha qo‘shma alyans tashkil qilinib, unga jami 200 milliard so‘m mablag‘ ajratilishi belgilangan.
2021-yil 1-sentabrgacha ochiq ma’lumotlar portali faoliyati doirasida davlat va boshqa ma’lumotlar to‘plamlarini olish imkoniyatini taqdim etuvchi raqamli ma’lumotlar platformasi yaratiladi.
Qarorga muvofiq, 2021/2022-o‘quv yilidan grant asosida Sun’iy intellekt yo‘nalishi bo‘yicha kadrlar tayyorlash bosqichma-bosqich boshlanadigan OTM va ilmiy tashkilotlar (5 ta) ro‘yxati tasdiqlangan.
Bundan tashqari, iqtisodiyot tarmoqlari, ijtimoiy soha va davlat boshqaruvi tizimida sun’iy intellekt texnologiyalarini amaliy qo‘llash bo‘yicha o‘quv kurslari va fanlarini joriy qilish ko‘zda tutilgan OTMlar ro‘yxati (15 ta) tasdiqlangan.
2021-yildan sun’iy intellekt sohasida stajyor-tadqiqotchilar hamda tayanch doktoranturada tahsil olish uchun har yili 5 kishilik kvota maqsadli ajratiladi. Raqamli texnologiyalar va sun’iy intellekt doktorantura ixtisosligi tashkil qilinadi.
Izoh (0)