Қашқадарё вилоятининг Шаҳрисабз шаҳрида фаолият юритувчи тадбиркор ўз маблағи ҳисобидан маиший хизмат уйи барпо этиб, 20 та янги иш ўрни яратишни ният қилган. Бироқ мазкур объектни қуриш учун 8 сотих ер ололмай, сарсон бўлмоқда.
Бу ҳақда «Дарё»га шикоят қилган тадбиркор Умида Кураеванинг айтишича, тадбиркорда аввалроқ ер ҳам бўлган.
«Бироқ, биз қурилишни бошламоқчи бўлган Шаҳрисабз шаҳридаги ‘Тепарлик’ маҳалласидаги 8 сотих ерга ижтимоий аҳволи оғир фуқаро иссиқхона қурмоқчи бўлиб, давлатдан кредит олган экан. Бу ишларни бошлаб қўйган шаҳарнинг собиқ ҳокими Тўлқин Каримов муаммони ечиш учун бизнинг ердан воз кечишимизни ва эвазига ўзимиз хоҳлаган жойдан 8 сотих ер ажратиб беришини айтди. Ҳокимнинг гапига ишониб, унинг айтганини қилдим. Ва бошқа манзилдан ер танладим», — дейди тадбиркор Умида Кураева.
Умида Кураеванинг айтишича, шаҳарнинг собиқ ҳокими Тўлқин Каримов унга бошқа жойдан ер ваъда қилиб, ҳужжатли еридан воз кечдиргач у учун кўрсатилган ерни ҳужжатлаштиришни пайсалга сола бошлаган.
«Ҳоким ваъда қилган ердан 8 сотих ер ажратиб олиб, барча ҳужжатлаштириш ишларини тугатдик. Фақат ҳоким имзоси қолди. Ҳоким ‘бугун имзо чекаман, эрта имзо чекаман’, деб бошқа ишга ўтиб кетди. Оқибатда биз ерсиз, иш бошлолмай қолдик. Шаҳарда янги ҳоким иш бошлагач ҳоким Акром Сулаймонов қабулида бўлиб, 20 та янги иш ўрни яратмоқчилигимни, собиқ ҳоким гапига ишониб, аввалги еримдан ажралиб қолганимни, янги ерни ҳужжатлаштириш ишлари эса якунланмагани сабаб қурилиш бошлолмаётганимни билдирдим ва ёрдам сўрадим», — дейди тадбиркор.
«Дарё» мухбири тадбиркор муаммоси билан 2020 йил декабрь ойи бошида ҳоким қабулида бўлганида Акром Сулаймонов лавозимга янги тайинланганини, ҳали масаладан бехабарлигини айтиб, муаммони ўрганиш учун вақт сўраганди. Ва муаммодан бехабарлиги сабаб ОАВга интервью беришдан бош тортганди.
«Иш бошлаганимга эндигина бир ҳафта бўлди. Муаммо билан танишиб чиқиб, тадбиркор муаммосини ечамиз», — деганди ҳоким мухбир билан суҳбатда.
Мурожаатчи тадбиркорнинг айтишича, янги ҳоким ваъдаси ҳам ўша пайт айтилган ва ўша жойда қолиб кетган.
«Ҳоким муаммони ўрганишини ва ижобий ҳал этишини ваъда берган бўлса-да, ўрганмади. Ҳатто бирор марта ёнига чақириб, муаммонгиз нима бўлди? Янги иш ўрни яратмоқчи экансиз, қандай ёрдамимиз керак, деб сўрамади ҳам», — дейди тадбиркор Умида Кураева.
Шаҳрисабз шаҳар ҳокимлиги юристи Мақсуд Исматовнинг маълум қилишича, тадбиркор Умида Кураеванинг қариндоши Ахтам Тўраевга 2018 йил 25 июнь куни аҳолига савдо ва хизмат кўрсатиш биносини қуриш учун 910 квадратметр ер майдони ажратиб берилган.
«Айнан шу ерни собиқ ҳоким Тўлқин Каримов ижтимоий оғир аҳволдаги фуқарога берган ва унинг иссиқхона қуриши учун рухсат қилган. Ваҳоланки, бу иш ноқонуний. Аммо ўша фуқаро аҳоволини ҳам тушунишга ҳаракат қиляпмиз. Биз ундан ерни тортиб олсак, давлатдан олган кредити ва қурган иссиқхонасини бузишга тўғри келади. Бу эса фуқарога зарар», — дейди тадбиркор Умида Кураева.
Шаҳрисабз шаҳар ҳокимлиги қурилиш бўлими масъулларининг айтишича, тадбиркор Ахтам Тўраевга, яъни унинг вакили Умида Кураевага берилган ер аслида тадбиркорнинг эски дўкони қурилган ер давлат манфаатлари учун олиб қўйилгани сабаб берилган.
«Энг қизиғи, ўзимизнинг дўконимиз учун берилган ердан ҳоким ваъдасига ишониб, кечдик. Ижтимоий оғир аҳволдаги фуқаро учун бердик. Эндиликда эса маиший савдо уйи қуриш учун ер ололмай, сарсонмиз. Собиқ ҳоким ҳам, янги ҳоким Акром Сулаймонов ҳам янги иш ўрни яратмоқчи бўлган тадбиркорни қўллаб-қувватлаш ўрнига, бизни сарсон-саргардон қилмоқда. Ваҳоланки, давлат раҳбарининг бугунги кун ҳокимларига қўйган асосий талаби — тадбиркорни қўллаб-қувватлаш ва тадбиркор орқали янги иш ўринлари яратиб, халқ фаровонлигини таъминлашдан иборат. Хўш, Шаҳрисабзда Президентнинг бу талаби бажарилмайдими?», — дейди тадбиркор Умида Кураева.
Шаҳрисабз шаҳар ҳокимлиги мазкур муаммога эътибор қаратади деган умиддамиз. «Дарё» воқеалар ривожини кузатишда давом этади.
Изоҳ (0)