Internetda Samsung Galaxy A52 smartfonining rasmiy taqdimotidan oldin uning texnik tavsifiga oid ma’lumotlar tarqaldi, deb xabar beradi Gizmochina.
Ta’kidlanishicha, yangi smartfon ikki xil versiyada taqdim etiladi — 5G va faqat LTE’ga ega. Birinchi variant yangi Qualcomm Snapdragon 750G protsessorida ishlasa, 4G qurilmaga Snapdragon 720G o‘rnatiladi.
Galaxy A52 piksellari soni 2400x1080 bo‘lgan 6,52 dyuymli Super AMOLED ekranga ega bo‘ladi va tasvirning yangilanish chastotasi 90 gertsni tashkil etadi, shuningdek, displeyga barmoq izi skaneri ham o‘rnatiladi.
Ma’lumotlarga ko‘ra, smartfon to‘rt kamerali sensor bilan jihozlanadi va ikki xil konfiguratsiyada chiqadi — 6/128 va 8/256 GB.
Yangi qurilma Samsung One UI 3’li Android 11 operatsion tizimiga ega bo‘ladi. Bundan tashqari, qurilma NFC kontaktsiz to‘lov funksiyasini qo‘llab-quvvatlaydi va chang, namdan IP67 standarti bo‘yicha himoyalanadi. Sig‘imi 4500 mA/soatga teng akkumulyator esa tezkor quvvatlana oladi.
Samsung Galaxy A52’ning taqdimoti 2021-yilning mart oyiga mo‘ljallangan. Model qatori to‘rt xil rangda bo‘ladi: Awesome White, Awesome Black, Awesome Blue va Awesome Violet.
Smartfonning 4G’ga ega versiyasi Yevropa bozorida 349 yevrodan, 5G versiyasi esa 449 yevrodan sotuvga chiqadi.
Avvalroq Samsung hamyonbop Galaxy F62 flagmaniga ulkan akkumulyator o‘rnatgani, kompaniya “yashirinish” xususiyatiga ega selfi-kamerali smartfon yaratgani to‘g‘risida xabar berilgandi.
Izoh (0)