Интернетда Samsung Galaxy А52 смартфонининг расмий тақдимотидан олдин унинг техник тавсифига оид маълумотлар тарқалди, деб хабар беради Gizmochina.
Таъкидланишича, янги смартфон икки хил версияда тақдим этилади — 5G ва фақат LTE’га эга. Биринчи вариант янги Qualcomm Snapdragon 750G процессорида ишласа, 4G қурилмага Snapdragon 720G ўрнатилади.
Galaxy А52 пикселлари сони 2400х1080 бўлган 6,52 дюймли Super AMOLED экранга эга бўлади ва тасвирнинг янгиланиш частотаси 90 герцни ташкил этади, шунингдек, дисплейга бармоқ изи сканери ҳам ўрнатилади.
Маълумотларга кўра, смартфон тўрт камерали сенсор билан жиҳозланади ва икки хил конфигурацияда чиқади — 6/128 ва 8/256 GB.
Янги қурилма Samsung One UI 3’ли Android 11 операцион тизимига эга бўлади. Бундан ташқари, қурилма NFC контактсиз тўлов функциясини қўллаб-қувватлайди ва чанг, намдан IP67 стандарти бўйича ҳимояланади. Сиғими 4500 мА/соатга тенг аккумулятор эса тезкор қувватлана олади.
Samsung Galaxy А52’нинг тақдимоти 2021 йилнинг март ойига мўлжалланган. Модель қатори тўрт хил рангда бўлади: Awesome White, Awesome Black, Awesome Blue ва Awesome Violet.
Смартфоннинг 4G’га эга версияси Европа бозорида 349 евродан, 5G версияси эса 449 евродан сотувга чиқади.
Аввалроқ Samsung ҳамёнбоп Galaxy F62 флагманига улкан аккумулятор ўрнатгани, компания «яшириниш» хусусиятига эга селфи-камерали смартфон яратгани тўғрисида хабар берилганди.
Изоҳ (0)